ټرمپ په واشنګټن کې د امریکا د خپلواکۍ د ۲۵۰مې کلیزې د نمانځلو لپاره یو لوی ملي جشن جوړ کړ.

په ۱۷۷۶ کال کې د خپلواکۍ د اعلامیې له لاسلیک کېدو راهیسې د دوه نیمو پیړیو د تېرېدو په مناسبت په دغه مهم تاریخي پړاو کې، پوځي الوتنې، د ځمکنیو او سمندري ځواکونو د ټیمونو پراشوټي نندارې او هغه څه شامل وو چې تنظیم کونکو د نړۍ په تاریخ کې د اورلوبو (آتش بازۍ) ترټولو لویه ننداره وبلله.

ولسمشر، چې د خپلې کورنۍ له غړو او د ادارې له لوړ پوړو چارواکو سره یوځای و، په خپله وینا کې یې تر ډېره د امریکا پر تاریخ او ملي ویاړ ټینګار وکړ.

ټرمپ وویل: "د ۲۵۰ کلونو راهیسې، متحده ایالات د نړۍ د ټولو ملتونو ترمنځ د هیلې، ژمنې، رڼا او دبدبې سرچینه ده. په ټوله نړۍ کې خلک هڅه کوي چې زموږ په څېر شي. هیڅوک زموږ په څېر کېدای نشي. او د خدای په مرسته، موږ به تل همداسې پاتې شو او یا به لا نور هم ښه شو."

موږ به انتظار وکړو

د ټرمپ وینا وروسته له هغه ترسره شوه چې سختو تندرونو او توپان په "نشنل مال" کې د ګډونوالو د لنډمهاله تخلیې او د ماښامنۍ وینا د ځنډېدو لامل شو.

ټرمپ په "ټروت سوشل" (Truth Social) کې په یو پیغام کې وویل، سره له دې چې هوا خرابه ده خو خپله وینا به کوي؛ هغه زیاته کړه چې تنظیم کونکي د توپان د تېرېدو انتظار کوي او احتمال لري وینا د ځايي وخت له مخې د شپې په ۱۱ بجو ترسره شي.

هغه وویل: "موږ به انتظار وکړو، که د سهار ۲ بجې وي او که یو ساعت وروسته وي، پروا نه کوي. داسې ښکاري چې توپان به تېر شي، دا تل تېرېږي. په هر حالت کې به زه هلته لاړ شم. اجازه به ورنکړم چې باران زموږ د ۲۵۰مې کلیزې مراسم ودروي."