تورکیې د ایران لپاره د جاسوسۍ په تور شپږ کسان ونیول

څارنوالان وايي، دې ډلې د انجرلیک هوايي اډې څارنه کوله او راټول شوي معلومات یې د سپاه پاسداران اړوندو کسانو ته لېږدول.

تورکي چارواکو ویلي، چې د ایران د استخباراتي خدمتونو لپاره د سیاسي او پوځي جاسوسۍ په تور یې په پنځو ولایتونو کې د عملیاتو په ترڅ کې شپږ شکمن کسان، چې یو یې ایراني او پنځه نور تورکي وګړي دي، نیولي دي.

دا همغږي عملیات د استانبول د لویې څارنوالۍ په لارښوونه، د استانبول د پولیسو د ترهګرۍ ضد څانګې او د ملي استخباراتو سازمان (MIT) په همکارۍ ترسره شول.

د قضیې د دوسیې له مخې، څېړونکو موندلې چې شکمن کسان د ایران د سپاه پاسداران له استخباراتي افسرانو سره په مستقیمه اړیکه کې وو.

چارواکو ویلي، دې ډلې د تورکیې د پوځي تاسیساتو، په شمول په جنوبي ادانا ولایت کې د ستراتیژیکې مهمې انجرلیک هوايي اډې، او همدارنګه په ترکیه او درېیمو هېوادونو کې د نورو ارزښتناکو ځایونو په اړه حساس معلومات راټولول. شکمن کسان د دې فعالیتونو لپاره د لوژستیکي ملاتړ په برابرولو هم تورن دي.

چارواکو وویل، دې ډلې د انجرلیک اډې د څارنې او کشف فعالیتونه ترسره کړي، درېیمو هېوادونو پر ضد د کارولو په موخه یې د تورکیې له لارې د بې پیلوټه الوتکو په قاچاق کې لاس درلود او راټول شوي استخباراتي معلومات یې په مستقیم ډول د سپاه پاسداران اړوندو کسانو ته لېږدول.

په ورته وخت کې په استانبول، وان، سامسون، یالوا او انقره کې چاپې ووهل شوې چې په پایله کې یې دا کسان ونیول شول.

چارواکو ویلي، چې د ولایتي امنیتي ریاستونو له پروسیجرونو وروسته، شکمن کسان محکمې ته وسپارل شول او د سیاسي او پوځي جاسوسۍ په تور توقیف شول.