د اوسلو په یوه سوداګریز مرکز کې ډزې شوي، مشکوک کس نیول شوی
دا پېښه د اوسلو په شمال کې د "سټورو" په سوداګریز مرکز کې شوې، چې تر دې دمه د کوم چا د ټپي کېدو راپور نه دی ورکړل شوی.
د ناروې پولیسو ویلي، چې په اوسلو کې له ډزو وروسته یو لوی سوداګریز مرکز له خلکو تش کړل شو او زیاتوي چې مشکوک بریدګر نیول شوی دی.
د اوسلو پولیسو د دوشنبې په ورځ د پېښو په خپل رسمي راپور کې ولیکل: "موږ نږدې ټول سوداګریز مرکز پلټلی او هېڅ ټپي شوی کس مو نه دی موندلی."
دا پېښه د اوسلو په شمال کې د سټورو په سوداګریز مرکز کې رامنځته شوې ده.
د پولیسو په وینا، له یوه ټوپک څخه یوازې یوه ډزه شوې ده.
د ډزو لامل او نور جزئیات تر اوسه نه دي روښانه شوي.
پولیسو وویل چې بریدګر یې نیولی دی، او داسې ښکاري چې هغه دا کار په یوازې ځان کړی دی.
د مشکوک کس هویت نه دی په ډاګه شوی.
