د فلپین ولسمشر فردیناند مارکوس جونیئر په هیواد کې فلپیني مسلمانان د اسلامي دودونو سره سم د سمدستي او مناسب تدفین اړوند قانون توشیح کړ.

د فلپین د ځايي رسنیو د خبر له مخې د فلپین د اسلامي تدفین قانون د اپرېل په ۱۱مه لاسلیک شوی و او د دوشنبې په ورځ د رسمي جریدې  په وېبپاڼه کې خپور شو، د انکوایرر نیټ د راپور له مخې د دې نوي قانون له مخې، تدفین باید ژر تر ژره ترسره شي، حتی که د مړینې سند شتون ونه لري.

خو قانون دا شرط لګوي چې هغه څوک چې د تدفین مراسم ترسره کوي یا د مړي نږدې خپلوان باید د مړینې راپور د ۱۴ ورځو دننه سیمه ییز روغتیا افسر ته ورکړي، چې د مړینې علت تایید کړي او د مړینې سند صادر کړي.

د قانون په وینا، "د اسلامي دودونو سره سم د تدفین لپاره، د مسلمان مړی باید د ۲۴ ساعتونو دننه د روغتون، طبي کلینیک، جنازې ځای، مرده خانې، توقیف ځایونو یا نورو ورته ځایونو څخه خوشې شي، یا د هغو کسانو لخوا چې د مړي په ساتنه کې دي."

دغه قانون هغه کسان چې د مسلمان مړي د روغتون یا جنازې ځای د بې ځایه او ناحقه فیسونو یا نورو غیر موجه دلایلو له امله انکار کوي، د یو څخه تر شپږو میاشتو بند، د ۵۰,۰۰۰ څخه تر ۱۰۰,۰۰۰ فلپیني پیسو (۸۸۲ څخه تر ۱,۷۶۴ ډالرو) جریمه، یا دواړو سره مجازات کوي.