د کرملین ویاند ډیمیتري پیسکوف وویل چې اوکراین پر نړیوالو انرژۍ زیربناوو د بریدونو له لارې د "ترهګریزو کړنو" تمایل ښودلی دی.
پیسکوف په پلازمېنه مسکو کې له خبریالانو سره د خبرو پر مهال د ورځنیو مسایلو په اړه د هغوی پوښتنې ځواب کړې.
نوموړي د نړیوالې انرژۍ سیسټم پر وړاندې د اوکراین د حکومت "تېري" ته په اشارې سره وویل: "زموږ په باور د کیف رژیم په دوامداره توګه د انرژۍ د مهمو نړیوالو تاسیساتو پر وړاندې ترهګریزو کړنو ته خپل تمایل ښودلی او موږ دا یو ډېر خطرناک کار بولو."
پیسکوف زیاته کړه چې دوی تورکیې ته د شین جریان او 'ترک جریان نللیکو پورې اړوند انرژۍ زیربناوو ته د متوجه خطرونو په اړه معلومات ورکړي دي. هغه همداراز پر تېلي ټانکرونو د بې پیلوټه الوتکو (ډرون) بریدونه د "ترهګریزو فعالیتونو" په توګه یاد کړل.
پیسکوف وویل چې دوی د دغو بریدونو د پایلو او زیانونو د کمولو لپاره اړین تدابیر نیولي دي.
د روسیې د انرژۍ شرکت 'ګازپروم' نن په یوه اعلامیه کې وویل چې د 'شین جریان' نللیکې له لارې د ګازو په لېږد کې کارېدونکی د 'کراسنودارسکایا' کمپرسور سټیشن د بې پیلوټه الوتکو لخوا په نښه شوی دی.
