د نړیوال صمود بېړیو په کاروان کې د اسرائیل له خوا نیول شوي ۳۶ تورکي وګړي به تورکیې ته ستانه شي
د تورکیې د بهرنیو چارو وزارت ویاند وايي چې په نړیوالو اوبو کې د اسرائیل له خوا د نیول شویو پاتې وګړو د خلاصون لپاره اقدامات روان دي.
د تورکیې د بهرنیو چارو وزارت ویلي، تمه ده هغه ۳۶ تورکي وګړي چې د اسرائیلي ځواکونو له خوا په نړیوالو اوبو کې د "نړیوال صمود" بېړیو په کاروان کې نیول شوي وو، نن ماسپښین په یوه ځانګړې الوتنه کې بېرته تورکیې ته ستانه شي.
د تورکیې د بهرنیو چارو وزارت ویاند د شنبې په ورځ پر اېکس (پخواني ټویټر) ولیکل: "وروستۍ شمېره لا نه ده معلومه. موږ خپلو هڅو ته دوام ورکوو ترڅو د خپلو پاتې وګړو لپاره ژر تر ژره لازم اقدامات بشپړ کړو او هغوی تورکیې ته راشي."
هغه زیاته کړه چې په دې پلان شوې الوتنه کې به د نورو هېوادونو وګړي هم شامل وي.
تر ۴۷۰ ډېر فعالان نیول شوي
د "ازادۍ بېړیو ایتلاف"، چې د نړیوالو مدني ټولنو یوه شبکه ده، له ۲۰۱۰ کال راهیسې څو ځلې هڅې کړې دي ترڅو د غزې کلابندي ماته کړي او د هغې بشري ناورین ته د نړۍ پام راواړوي.
اسرائیلي سمندري ځواکونو د پنجشنبې په ورځ د "نړیوال صمود" بېړیو پر کاروان برید وکړ، کښتۍ یې ونیولې او له ۵۰ څخه د زیاتو هېوادونو څه باندې ۴۷۰ فعالان یې بندیان کړل.
دغه کاروان هڅه کوله چې غزې ته بشري مرستې ورسوي او پر دې سیمې د اسرائیل لګول شوې کلابندي وننګوي.
اسرائیل له نږدې ۱۸ کلونو راهیسې غزه، چې د شاوخوا ۲.۴ میلیونه خلکو کور دی، کلابنده کړې ده. د ۲۰۲۳ کال له اکتوبر میاشتې راهیسې، د اسرائیل په بمباریو کې په دې تړانګه کې نږدې ۶۶,۳۰۰ فلسطینیان وژل شوي، چې ډېری یې ښځې او ماشومان دي، او دا سیمه یې د اوسېدو وړ نه ده ګرځولې. دغې کلابندۍ غزه له قحطۍ سره هم مخ کړې ده.
