دواړو وزیرانو د خپلمنځي اړیکو او تماسونو پر دوام هوکړه وکړه.
د روسیې د بهرنیو چارو وزیر سرګي لاوروف له خپل امریکایي سیال مارکو روبیو سره په لیدنه کې د اوکراین پر کړکېچ خبرې وکړې.
د روسیې د بهرنیو چارو وزارت د خبرپاڼې له مخې، لاوروف او روبیو د فیلیپین په پلازمېنه مانیلا کې د سویل ختیځې اسیا د هېوادونو د ټولنې (آسیان -) د غونډو په څنډه کې سره وکتل.
په دغه لیدنه کې لاوروف خپل امریکایي ساري ته د جګړې په لومړۍ کرښه کې د حقیقي وضعیت په اړه معلومات ورکړل او ویې ویل: "د هغو اروپایي هېوادونو بې ثباته کوونکې پالیسۍ چې د کییف له ادارې سره د وسلو د مرستې له لارې روسیې ته د سټراټیژیکې ماتې ورکولو هڅه کوي، د منلو وړ نه دي."
لاوروف همدارنګه تایید کړه چې روسي لوری د مسلې سیاسي او ډیپلوماټیک حل ته چمتو دی او د اګست په ۱۵مه له امریکا سره په "الاسکا سرمشریزه" کې پر شویو هوکړو ولاړ دی.
په دغه ناسته کې پر سیمه ییزو او نړیوالو مسایلو هم مشورې وشوې او دواړو وزیرانو د فارس خلیج د وضعیت په اړه د نظرونو تبادله وکړه. د دوه اړخیزو اړیکو د ښه کولو په لړ کې، د روسیې او امریکا د ډیپلوماټیکو استازولیو د کاري شرایطو د ښه کولو موضوع هم وڅېړل شوه.
لاوروف او روبیو د روسیې د فضايي ادارې (Roscosmos) او د امریکا د ملي هوايي چلند او فضايي ادارې (NASA) ترمنځ د اړیکو د بیا پیل کېدو هرکلی وکړ. همدارنګه دواړو لورو د خپلو پارلمانونو ترمنځ د تبادلو او کلتوري اړیکو پر پیاوړتیا ټینګار وکړ.
په پای کې، دواړه لوري د بهرنیو چارو وزارتونو ترمنځ د تماسونو پر دوام سره سلا شول.
