د امریکا د خزانې وزیر سکاټ بیسنټ ویلي، چې د چهارشنبې له ورځې به د ایران د ټولو سوداګریزو هوايي شرکتونو فعالیتونه په نړیواله کچه ودرول شي.

بیسنټ د دوشنبې په ورځ له امریکايي ټلویزیوني شبکې «CNBC» سره په خبرو کې، د تهران د ملکي هوايي چلند شبکې د منزوي کولو په موخه د پراخو ثانوي بندیزونو د بیانولو پر مهال وویل: "د سپټمبر په ۲۳مه به د ایران ټول هوايي شرکتونه په ټوله نړۍ کې وتړل شي."

بیسنټ څرګنده کړه، هغه نړیوال (هوايي ډګرونه) چې ایراني الوتکو ته خدمات وړاندې کوي، د امریکا له بانکي سیستم څخه به په بشپړه توګه وایستل شي.

هغه خبرداری ورکړ چې بهرني چلونکي نه شي کولی د ډالرو د راکړې ورکړې سیستم ته د خپل لاسرسي له خطر سره مخ کولو پرته، دې الوتکو ته تېل ورکړي، د ناستې اسانتیاوې ورته برابرې کړي، او یا یې د مسافرو ټکټونه وپلوري.

ایراني چارواکو د پلان شویو هوايي محدودیتونو په اړه سمدستي کوم رسمي غبرګون نه دی ښودلی.

پر هوايي چلند دا بندیز په داسې حال کې لګول کېږي چې د ایران جګړه خپلو اوومې میاشتې ته داخله شوې، او واشنګټن د «اقتصادي قهر» عملیاتو تر چتر لاندې د تهران پر وړاندې خپل اقتصادي اقدامات لا پسې زیاتوي.

دا جګړه د فبرورۍ په وروستیو کې د امریکا او اسرائیلو له همغږو بریدونو وروسته پیل شوه، چې د هرمز په تنګي کې یې د سمندري تګ راتګ د خنډونو، په سیمه کې د پرله پسې توغندیو د تبادلې، او د ایران پر سوداګریزو او مالي لارو د فشارونو د زیاتېدو لامل شوه.