د افغانستان په شمال کې د اوسیدونکو او د سرو زرو د استخراج شرکت ترمنځ په نښته کې ۴ کسان ووژل شول
چارواکو د چهارشنبې په ورځ وویل چې د افغانستان په شمال کې د ځایی اوسیدونکو او د سرو زرو د یوه شرکت د کارکوونکو ترمنځ په خونړیو نښتو کې څلور کسان وژل شوي او پنځه نور ټپیان دي.
د کورنیو چارو وزارت ویاند، عبدالمتین قانع وویل، دا تاوتریخوالی د سهشنبې په ورځ د تخار ولایت په چاه آب ولسوالۍ کې رامنځته شو، چې په پایله کې یې درې تنه ځایی اوسیدونکي او د شرکت یو کارکوونکی ووژل شول. په پېښه کې پنځه نور کسان ټپیان شوي هم دي.
قانع دا روښانه نه کړه چې د نښتو لامل څه و او نه یې هم د شرکت د مالکیت په اړه معلومات ورکړل.
ښاغلي قانع په یوه بیان کې وویل چې د تاوتریخوالي په تړاو دوه تنه نیول شوي – چې یو یې د شرکت امنیتي کارکوونکی او بل یې ځایی اوسیدونکی دی. هغه زیاته کړه چې امنیتي ځواکونو په چټکۍ سره سیمه کې نظم ټینګ کړی او د تخار مرستیال والي هم د وضعیت د ارزونې لپاره ولسوالۍ ته تللی دی.
د قانع په وینا، د شرکت فعالیتونه ځنډول شوي دي.
د ولایت ویاند، اکبر حقاني وویل، چارواکو د نښتې له سیمې څخه لیدنه کړې او نور جزئیات به د څېړنو له پای ته رسېدو وروسته خپاره شي.
په ۲۰۲۳ کال کې، د افغانستان واکمن حکومت اعلان وکړ چې د ۶.۵ میلیارده ډالرو په ارزښت یې د کانونو اوه قراردادونه لاسلیک کړي، چې دا په ۲۰۲۱ کال کې واک ته له رسېدو راهیسې د معاملاتو تر ټولو لوی پړاو ګڼل کېږي.
افغانستان د ډبرو سکرو، مسو، اوسپنې، زنکو، سرو زرو او سپینو زرو په ګډون بډایه معدني زیرمې لري.
