د سوریې ځواکونو او د امریکا په مشرۍ ائتلاف د دمشق سره نږدې د داعش یو جګپوړی مشر ونیو
د کورنیو چارو وزارت وايي، طه الزعبي په پلازمېنه کې د داعش د عملیاتو مشري کوله. دولتي رسنۍ وايي، شکمن کس د چاودېدونکو توکو واسکټ په تن نیول شوی دی.
سوریې ویلي، چې د پلازمېنې دمشق په کلیوالي سیمو کې د سوریې د امنیتي ځواکونو او د امریکا په مشرۍ د نړیوال ائتلاف په ګډو عملیاتو کې د داعش یو جګپوړی مشر نیول شوی دی.
د سوریې د چارواکو په وینا، شکمن کس، طه الزعبي، چې په ابو عمر طبیه هم مشهور دی، د دمشق لپاره د داعش د تش په نامه "والي" یا والي په توګه دنده ترسره کوله. هغه د چهارشنبې په ورځ ناوخته له خپلو څو مرستیالانو سره ونیول شو.
د سوریې دولتي تلویزیوني چینل الاخباریه د کورنیو چارو وزارت د یوې سرچینې په حواله راپور ورکړی: "د ائتلافي ځواکونو او د کورني امنیت د واحدونو له خوا د ترسره شویو عملیاتو په پایله کې، د داعش تش په نامه د دمشق والي ونیول شو."
د سوریې له رسمي خبري اژانس سانا سره په خبرو کې، د دمشق په کلیوالي سیمو کې د کورني امنیت مشر، برید جنرال احمد الدالاتي وویل، چې دا نیونه له اوږدې مودې څارنې وروسته وشوه.
هغه وویل، ګډ عملیات د کورنیو چارو وزارت تر چتر لاندې د استخباراتو عمومي ریاست لخوا، د ائتلافي ځواکونو سره په همغږۍ، د معدمیه په ولسوالۍ کې د داعش د یوې حجرې پر وړاندې ترسره شول.
الدالاتي زیاته کړه چې الزعبي او د هغه څو مرستیالان په داسې حال کې ونیول شول چې چاودیدونکي واسکټونه یې اغوستي وو.
