ملګرو ملتونو پر پاکستان او افغانستان غږ کړی چې د ملکي وګړو د ساتنې لپاره جګړې ودروي
دا اعلامیه وروسته له هغې خپره شوه چې څو ورځنۍ جګړې په دواړو هېوادونو کې لسګونه کسان ووژل او سلګونه نور یې ټپیان کړل.
په افغانستان کې د ملګرو ملتونو مرستندویه پلاوي (یوناما) په یوه اعلامیه کې ویلي چې د اکتوبر له لسمې راهیسې د پاکستان او افغانستان ترمنځ په نښتو کې په افغانستان کې لږ تر لږه ۱۸ کسان وژل شوي او تر ۳۶۰ ډېر ټپیان دي.
اعلامیې د پنجشنبې په ورځ زیاته کړه: "یوناما پر ټولو خواوو غږ کوي چې د ملکي وګړو د ساتنې لپاره دښمنیو ته تلپاتې پای ورکړي."
دا اعلامیه له څو ورځنۍ جګړې وروسته خپره شوه چې په دواړو هېوادونو کې یې لسګونه کسان ووژل او سلګونه نور یې ټپیان کړل.
دا له ۲۰۲۱ کال راهیسې په افغانستان کې طالبان واک ته د رسیدو نه راپدیخوا د دغو دوو ګاونډیانو ترمنځ تر ټولو مرګونی کړکېچ دی چې رامنځته کیږي.
د اکتوبر له لسمې راهیسې پوله ییز تاوتریخوالی زیات شوی، او هر هېواد وايي چې دوی د بل لوري د وسله والو لمسونو په ځواب کې غچ اخیستونکی اقدام کړی.
د چهارشنبې په ورځ دواړو خواوو پر اوربند هوکړه وکړه. دا اوربند د سیمې د لویو ځواکونو له غوښتنو وروسته وشو، ځکه تاوتریخوالي د یوې داسې سیمې د بې ثباته کېدو ګواښ رامنځته کړی و چې القاعده په ګډون ځینې ډلې هڅه کوي بېرته په کې راڅرګندې شي.
د شپې له خوا د جګړې هیڅ راپور نه دی ورکړل شوی.
په افغانستان کې د ملګرو ملتونو مرستندویه پلاوي د اوربند هرکلی وکړ او ویې ویل چې لا هم د مرګ ژوبلې د شمېر په ارزونه بوخت دي. دې ادارې وویل چې تر ټولو درنه مرګ ژوبله د چهارشنبې په ورځ په سوېل کې اوښتې ده.
پاکستان د خپلې پولې په غاړه د اوښتې ملکي مرګ ژوبلې په اړه شمېرې نه دي وړاندې کړې.
دغه هېواد په پرله پسې توګه پر افغانستان د ترهګرو د پناه ورکولو تور لګولی، هغه تور چې طالبانو رد کړی دی. پاکستان له هغو بریدونو سره لاس او ګرېوان دی چې له ۲۰۲۱ کال راهیسې زیات شوي دي.
دواړه هېوادونه د ۲،۶۱۱ کیلومتره (۱،۶۲۲ میله) اوږدې ګډې پولې لرونکي دي چې د ډیورنډ کرښې په نوم یادېږي، او افغانستان هېڅکله په رسمیت نه ده پېژندلې.
