لاوروف په مسکو کې د افغانستان د بهرنیو چارو له وزیر متقي سره وکتل
د روسیې د بهرنیو چارو وزیر سرګي لاوروف د افغانستان د حکومت د بهرنیو چارو له وزیر امیرخان متقي سره په پلازمېنه مسکو کې وکتل.
د روسیې د بهرنیو چارو وزارت د یوې اعلامیې له مخې، د لاوروف او متقي ترمنځ دا لیدنه د افغانستان په اړه د "مسکو فارمټ مشورتي غونډې" له پیل مخکې ترسره شوه.
د لیدنې په هغه برخه کې چې د رسنیو پر مخ پرانیستې وه، لاوروف د افغانستان په غونډه کې د متقي پر ګډون خوښي څرګنده کړه.
لاوروف په سیمه کې د وضعیت له ستونزو سره سره، په افغانستان کې له ترهګرۍ او د نشه يي توکو له قاچاق سره په مبارزه کې مهمو پرمختګونو ته په اشارې سره وویل، چې روسیه چمتو ده په دې برخه کې د افغانستان له حکومت سره مرسته وکړي.
