ټرمپ ادعا کوي امریکا د ایران سمندري ځواک له منځه وړی او د توغندیو ډېری توغونکي مرکزونه یې ویجاړ کړي

د امریکا ولسمشر وایي چې د ایران پوځي وړتیاوې سختې کمزورې شوې دي او زیاتوي چې د جګړې د پای ته رسولو پرېکړه به د اسرائیل له لومړي وزیر بنیامین نتانیاهو سره په ګډه وشي.

د امریکا ولسمشر ډونالډ ټرمپ د یکشنبې په ورځ وویل چې امریکايي ځواکونو د ایران ټولې جنګي بېړۍ ډوبې کړې او د توغندیو د توغولو ډېری پلټفارمونه یې ویجاړ کړي دي.

ټرمپ له فاکس نیوز (Fox News) سره په خبرو کې وویل چې د امریکا عملیاتو د ایران پوځي وړتیاوې په پام وړ ډول کمزورې کړې دي. هغه وویل: "موږ د ایران ټولې بېړۍ ډوبې کړې او د توغندیو ډېری توغونکي مرکزونه مو له منځه وړي، یوازې ۲۰ سلنه یې پاتې دي."

د امریکا ولسمشر دا هم وویل چې دی به پر ایران د امریکا او اسرائیل د جګړې د پای ته رسولو پرېکړه د اسرائیل له لومړي وزیر بنیامین نتانیاهو سره په مشوره وکړي.

کله چې له ټرمپ څخه د ټایمز آف اسرائیل (Times of Israel) ورځپاڼې سره په مرکه کې وپوښتل شول چې ایا نتانیاهو به د جګړې د پای ته رسولو په پرېکړه کې برخه ولري، هغه وویل: "زما په خیال دا به یوه دوه اړخیزه پرېکړه وي... موږ په دې اړه خبرې کوو. زه به په مناسب وخت کې پرېکړه وکړم، خو ټول اړخونه به په پام کې ونیول شي."

ټرمپ په دې اړه له نظر ورکولو ډډه وکړه چې ایا ممکن اسرائیل د امریکا له خوا د بریدونو له بندولو وروسته هم خپلو بریدونو ته دوام ورکړي، هغه یوازې وویل: "زه فکر نه کوم چې دې ته به اړتیا پاتې شي."

سپینې ماڼۍ د جمعې په ورځ ویلي وو چې تمه لري دا جګړه له څلورو تر شپږو اونۍ دوام وکړي، خو دا مهالویش په تېره اونۍ کې په چټکۍ سره بدل شوی او ټرمپ په ځلونو د جګړې لپاره د دقیق وخت له ټاکلو ډډه کړې ده.

سیمه ییز تاوتریخوالی وروسته له هغه خورا زیات شو چې امریکا او اسرائیل د فبرورۍ په ۲۸مه پر ایران پراخ بریدونه پیل کړل، چې د راپورونو له مخې تر ۱۲۰۰ ډېر کسان پکې ووژل شول. په وژل شویو کې ستر مذهبي مشر آیت الله علي خامنه اي، تر ۱۵۰ ډېرې ښوونځي پېغلې او لوړپوړي پوځي چارواکي شامل دي.

ایران په ځواب کې په سیمه کې پر امریکايي اډو، ډیپلوماټیکو مرکزونو او پوځي پرسونل، او همدارنګه د اسرائیل پر څو ښارونو پراخ توغندیز او د ډرون بریدونه کړي دي. په دغو بریدونو کې لږ تر لږه شپږ امریکايي سرتېري وژل شوي دي. د ایران بریدونه لا هم په شدت سره دوام لري او راپورونه وایي چې تهران پر اسرائیل د کلسټر (خوشه يي) بمونو لرونکي توغندي هم ویشتلي دي.

تر دې وړاندې د یکشنبې په ورځ، د ایران د خبرګان شورا اعلان وکړ چې مجتبی خامنه اي یې د خپل پلار علي خامنه اي پر ځای د نوي ستر مشر په توګه ټاکلی دی. د ایران سپاه پاسداران (IRGC) هم سمدستي د مجتبی خامنه اي له ټاکل کېدو ملاتړ وکړ.

ټرمپ له ABC News سره په یوه بله مرکه کې وویل چې کشر خامنه اي به د ده له تایید پرته "ډېر وخت پاتې نشي." هغه زیاته کړه: "هغه باید زموږ تایید ترلاسه کړي، که یې ترلاسه نکړي، ډېر وخت به دوام ونکړي. موږ غواړو ډاډ ترلاسه کړو چې مجبور نشو په هرو ۱۰ کلونو کې بېرته دې حالت ته راوګرځو."