ایران وايي د بندر عباس پر سر یې د امریکا یوه بې پیلوټه الوتکه (ډرون) نسکوره کړې ده
ایران ویلي چې هوايي دفاعي ځواکونو یې د بندر عباس پر سر د امریکا یوه ډرون الوتکه د هغو عملیاتو پر مهال کشف او ویجاړه کړې، چې د دښمن د احتمالي بریدونو په ځواب کې ترسره کېدل.
د ایران پوځ د دوشنبې په ورځ ادعا وکړه چې هوايي دفاعي ځواکونو یې د هیواد په سویل کې د بندر عباس ښار پر سر د امریکا یوه بې پیلوټه الوتکه ویشتلې او نسکوره کړې ده.
مهر خبري اژانس د پوځ د یوې اعلامیې په حواله ویلي چې د ایران په سویل ختیځ کې هوايي دفاعي ځواکونو د بندر عباس ښار د حاجي اباد سیمې ته نږدې یوه "لوکاس ډوله" (Lucas-type) دښمنه الوتکه پېژندلې، تعقیب کړې او بیا یې ویجاړه کړې ده. پوځ ویلي چې دا الوتکه هغه مهال ویشتل شوې چې هوايي دفاعي واحدونو "د دښمن بریدونو ته ځواب ورکاوه او د هیواد هوایي حریم یې خوندي کاوه."
دا راپور څو ساعته وروسته له هغه خپرېږي چې امریکا په ټول ایران کې پر نظامي او بنسټیزو اهدافو نوي بریدونه وکړل. په دغو بریدونو کې په بوشهر، خوزستان او هرمزګان ولایتونو کې ځینې ځایونه او د تهران او مشهد ترمنځ د اورګاډي بنسټیزه پټلۍ په نښه شوې ده.
تهران په مقابل کې په بحرین، کویټ او قطر کې د امریکا پر پوځي تاسیساتو د توغندیو او ډرون بریدونو خبر ورکړی دی. ایران واشنګټن تورن کړ چې د جون د ۱۷مې نېټې هغه تفاهم لیک یې تر پښو لاندې کړی چې د پاکستان په منځګړیتوب ورباندې هوکړه شوې وه.
ګاونډیو هیوادونو ته د ایران خبرداری
د ایران د بهرنیو چارو وزارت په یوه اعلامیه کې ګاونډیو هیوادونو ته خبرداری ورکړی چې اجازه ورنکړي چې خاوره یا تاسیسات یې د امریکا یا نورو لوریو لخوا د ایران پر ضد د بریدونو لپاره وکارول شي. په اعلامیه کې راغلي چې ګاونډي هیوادونه د نړیوالو قوانینو له مخې مسؤل دي چې د خپلې خاورې څخه د ایران پر وړاندې د نظامي اقداماتو مخه ونیسي. ایران خبرداری ورکړ چې د هر برید "سرچینه او پیل ځای" به د ایران د وسله والو ځواکونو لخوا په نښه شي.
دا پېښې څو ساعته وروسته له هغه کېږي چې امریکايي پوځ پر ایران د نویو بریدونو خبر ورکړ او ویې ویل چې هدف یې په هرمز تنګي کې پر سوداګریزو کښتیو د بریدونو لپاره د تهران د وړتیا کمول دي.
د ایران د بهرنیو چارو وزارت په تېرو ۲۲ ساعتونو کې د امریکا بریدونه په کلکه غندلي او هغه یې د ملګرو ملتونو د منشور ښکاره سرغړونه بللې ده. دغه وزارت واشنګټن تورن کړ چې د ۲۵ ورځې وړاندې لاسلیک شوي تفاهم لیک نږدې هره ماده یې ماته کړې او د ټرانسپورټي زیربناوو، کب نیونکو کښتیو، سوداګریزو بېړیو او هوا پېژندنې تاسیساتو په نښه کولو سره یې "جنګي جنایتونه" کړي دي.
وزارت همداراز امریکا د هرمز تنګي په چارو کې په مداخلې تورنه کړه او ویې ویل چې د واشنګټن دغو اقداماتو دغه ستراتیژیکه اوبلاره ناامنه کړې او نړیواله سوداګریزه بېړۍ چلونه یې له خنډ سره مخ کړې ده.
