د قطر د کورنیو چارو وزارت د یکشنبې په ورځ وویل، چې د هېواد په سیمه ییزو اوبو کې د یوې چورلکې له غورځېدو وروسته له اوو بې درکه شویو کسانو څخه د شپږو مړي موندل شوي دي.

د وزارت په یوه خبرپاڼه کې راغلي چې د لټون او ژغورنې روانو عملیاتو په پایله کې د هغو شپږو کسانو مړي موندل شوي چې په الوتکه کې سپاره وو، او د هغوی مړینه یې تایید کړې ده.

چارواکو ویلي چې ځانګړي ټیمونه د پاتې یوه بې درکه کس د موندلو لپاره خپلو ګړندیو هڅو ته دوام ورکوي.

وزارت د غورځېدو د لامل او یا په چورلکه کې د سپرو کسانو د هویت په اړه نور جزئیات نه دي ورکړي.

تر دې مخکې د یکشنبې په ورځ، د قطر دفاع وزارت ویلي وو چې یوې چورلکې د خپل ورځني ماموریت پر مهال "تخنیکي ستونزه" پیدا کړې او د هېواد په سیمه ییزو اوبو کې غورځېدلې ده.

له تخنیکي ستونزې پرته د پېښې د لامل په اړه سمدستي نور معلومات نه دي ورکړل شوي، او داسې کومه نښه هم نشته چې دا غورځېدل دې د کوم دښمنانه اقدام پایله وي.

دا پېښه په سیمه کې د زیات شوي تاوتریخوالي په منځ کې رامنځته شوې ده.

له کله چې د فبرورۍ په ۲۸مه امریکايي او اسرائیلي ځواکونو پر ایران ګډ بریدونه پیل کړي، قطر په پرله پسې توګه د ایران د بې پیلوټه الوتکو او توغندیو تر بریدونو لاندې راغلی، چې په کې یې پر "راس لفان" صنعتي ښارګوټي - د نړۍ د مایع طبیعي ګاز (LNG) یو له سترو مرکزونو څخه - څو بریدونه هم شامل دي.