د روسیې د جاپان په سمندر کې د خپل پرمختللي اوبتل سره تطبیقات ترسره کړل
د روسیې د دفاع وزارت د جاپان په سمندر کې د پوځي تطبیقاتو په چوکاټ کې د ډیزل بریښنایی اوبتل اوفا څخه د کالیبر کروز توغندي ازمایلي دي.
د روسیې د دولتي خبري اژانس تاس راپور ورکړی چې په آرام سمندر کې د روسیې د سمندري ځواکونو اړوند یو اوبتل د جاپان په سمندر کې تمرینونه ترسره کړل، په سمندر او ساحل کې په جعلي اهدافو کروز توغندي وتوغول.
د روسیې د دفاع وزارت د چهارشنبې په ورځ ویلي دي "د ټاکل شوي تمرین په جریان کې په د آرام سمندر د روسیې سمندري ځواکونو اړوند د ډیزل بریښنایی اوبتل اوفا د جاپان د سمندر له اوبو څخه په سمندر او ساحلي اهدافو د کالیبر کروز توغندي وتوغول."
وزارت وویل چې د تمرینونو په جریان کې ټول جعلي هدفونه په نښه شوي او د ډزو واټن له ۱۰۰۰ کیلومترو څخه ډیر و.
د تاس په پخوانیو راپورونو کې راپور ورکړل شوی چې اوفا، چې د نړۍ ترټولو خاموش اوبتلونو څخه ګڼل کیږي، د ۲۰۲۲ کال په نوامبر کې د روسیې د سمندري ځواکونو په چوکاټ کې په فعالیت پیل وکړ.
دا اوبتل ۷۴ متره اوږد دی، او څه باندې ۳۹۰۰ ټنو وزن لري.
دا کولی شي د ۲۴۰ مترو کاري ژوروالي او د ۳۰۰ مترو اعظمي ژوروالي ته ډوب شي.