سینټکام ویلي چې پر ایراني پوځي وړتیاوو د وروستیو بریدونو هدف د دغه هېواد د پوځي ځواک کمزوري کول دي.
امریکا په سیمه کې د کړکېچ له زیاتېدو سره سم، د ایران پر پوځي اهدافو د بریدونو نوې لړۍ پیل کړې ده.
سینټکام په یوه بیان کې وویل: "نن د ختیځ په وخت مازدیګر ۵:۳۰ بجې، امریکایي ځواکونو د اعلی سرقومندان په لارښوونه د ایران پر پوځي هدفونو نور بریدونه ترسره کړل."
سینټکام پر اېکس (پخواني ټویټر) لیکلي: "دا ماموریت به د ایران هغه وړتیا نوره هم کمزورې کړي چې په سیمه ییزو اوبو کې ملکي بېړۍ او سوداګریزې کښتۍ ګواښي."
په ورته وخت کې، د کویټ پوځ ویلي چې د دغه هېواد هوايي دفاعي سیسټم د ایران له لوري یو ډرون (بې پیلوټه الوتکه) برید شنډ کړی دی. د پوځ لوی درستیز ویلي چې د چاودنو غږونه د ډرون الوتکو د ویشتلو او مخنیوي له امله وو. په پوځي بیان کې زیاته شوې: "له ټولو غوښتل کیږي چې د اړوندو چارواکو امنیتي لارښوونې په پام کې ونیسي."
سیمه ییز کړکېچ له هغه وخته زیات شوی چې امریکا او اسرائیل د فبرورۍ په وروستیو کې پر ایران ګډ برید وکړ. که څه هم تېره میاشت امریکا او ایران د پاکستان په منځګړیتوب د کړکېچ د پای ته رسولو او دایمي سولې ته د رسېدو لپاره یو تفاهم لیک لاسلیک کړ، خو تېره اونۍ د هرمز تنګي پر سر جنجال یو ځل بیا راپورته شو او دواړو لورو پر یو بل ځوابي بریدونه وکړل.
د امریکا د دفاع وزارت د معلوماتو له مخې، د فبرورۍ له ۲۸مې راهیسې چې پر ایران بریدونه پیل شوي، تر اوسه ۱۸ امریکایي سرتېري وژل شوي او ۴۴۷ نور ټپیان شوي دي.
