د یمن د دولتي ځواکونو پر کاروان بمي برید کې پنځه تنه وژل شوي
د جنوبي عمالقه لوا پر یوه جګپوړي چارواکي برید کې درې تنه نور ټپیان شوي
د یمن حکومت د چهارشنبې په ورځ اعلان وکړ چې د دغه هېواد په لنډمهاله پلازمېنه عدن کې د جنوبي عمالقه لوا پر کاروان په یوه بمي برید کې پنځه تنه وژل شوي او درې نور ټپیان دي.
حکومت په یوه لیکلي بیان کې ویلي، چې دغه برید د سیولې په سیمه کې د جنوبي عمالقه لوا - د دویمې لوا د قوماندان، برید جنرال حمدي شکري پر کاروان شوی دی.
په بیان کې پر کاروان دا "غدارانه ترهګریز برید" په کلکه غندل شوی.
په بیان کې ویل شوي چې پر وسله والو ځواکونو یا پوځي مشرانو هر ډول برید به له مخنیوونکو اقداماتو سره مخ شي، او ټینګار شوی چې دا هڅه به ناکامه شي.
که څه هم په بیان کې د شکري د روغتیايي وضعیت په اړه معلومات نه دي ورکړل شوي، خو د پوځ اړوندې لوا رسنیز مرکز ویلي چې هغه سطحي ټپي شوی او تر درملنې لاندې دی.
تر اوسه کومې ډلې د دغه برید مسؤلیت نه دی منلی.
