د فلسطیني مقاومت ډلې حماس مشر خلیل الحیه د یو بیړني نړیوال مرستندویه کمپاین غږ کړی ترڅو په غزه کې فلسطینیانو ته عاجله سرپناه برابره شي، ځکه چې د ژمي سختو بارانونو د بېځایه شویو کډوالو کمپونه تر اوبو لاندې کړي او په ټوله سیمه کې یې زرګونو لنډمهالو ودانیو ته زیان اړولی دی.
د دغې فلسطیني ډلې په وینا، الحیه عربي او اسلامي حکومتونو ته په رسمي لیکونو کې پر هېوادونو غږ کړی چې د ژمنیو خیمو، د تودوخې توکو، سون توکو، او غزې ته د هغو وسایلو سمدستي ننوتل تضمین کړي چې د فاضله اوبو او د باران اوبو د ویستلو لپاره د زیانمنو شویو شبکو د ترمیم لپاره اړین دي.
الحیه د بشري ناورین لا پسې خرابېدو اصلي لامل د مرستو او د بیارغونې د موادو پر ننوتلو د اسرائیلو دوامداره محدودیتونو په ګوټه کړي . همداشان د استوګنې کورونو او ښاري اسانتیاوو پراخې ویجاړۍ دا ستونزه نوره هم سخته کړې ده.
هغه ټینګار وکړ چې په غزه کې شته شرایط نور د یو لنډمهاله مرستندویه ناورین یا د جګړې د یوې حتمي پایلې په توګه نشي ګڼل کېدای.
د اوربند مراعاتول
د حماس مشر پر اسرائیلو د همغږي نړیوال فشار غوښتنه وکړه ترڅو د اوربند تړون په بشپړ ډول پلي کړي، چې په کې له غزې څخه د پوځي ځواکونو بشپړ وتل او په شرم الشیخ کې لاسلیک شویو بشري پروتوکولونو ته غاړه ایښودل شامل دي.
الحیه همدارنګه د ملګرو ملتونو ادارو او بشردوستانه ماموریتونو ته د بېقید او شرطه لاسرسي غوښتنه وکړه، او ترڅنګ یې د هغې فلسطیني ملي کمېټې د ننوتلو اجازه هم وغوښته چې د دغې سیمې د ادارې لپاره ټاکل شوې ده.
د هغه په غوښتنه کې د خوندي سرپناه د برابرولو، د بنسټیزو زېربناوو د بیارغونې، او د اوږدمهاله بیارغونې د تمویل لپاره د مستقیمو مالي مرستو غوښتنې هم شاملې وې.
هغه د ملګرو ملتونو پر امنیت شورا هم غږ وکړ چې د دې ژورېدونکي ناورین د حل لپاره یوه بیړنۍ علني غونډه راوبولي، او یادونه یې وکړه چې په تېرو ۴۸ ساعتونو کې یې له منځګړو سره اړیکه نیولې ترڅو د عاجلې مداخلې غوښتنه وکړي.
سختو اورښتونو په ټوله غزه کې لنډمهاله کمپونه تر اوبو لاندې کړي، چې له امله یې سلګونه زره بېځایه شوې کورنۍ د پلاستیکي ترپالونو، کمبلو او محافظتي توکو د شدید کمښت په منځ کې د ژمي له سختې یخنۍ سره مخ شوې دي.
د ملګرو ملتونو د بشري چارو د همغږۍ دفتر (OCHA) د جمعې په ورځ راپور ورکړ چې سیلابونو له ۲۰۰,۰۰۰ څخه ډېر فلسطینیان اغېزمن کړي او هغو لنډمهالو سرپناوو ته یې زیان اړولی چې له ۴۰,۰۰۰ څخه ډېرې کورنۍ پکې اوسېږي.
د روغتیا نړیوال سازمان (WHO) جدي خبرداری ورکړی چې ۹۵۰,۰۰۰ بېځایه شوي خلک په داسې سیمو کې ژوند کوي چې د سیلابونو له خطر سره مخ دي، چې له دې ډلې له ۴۰۰,۰۰۰ څخه ډېر کسان په خورا لوړ خطر لرونکو سیمو کې اوسېږي او د ویجاړوونکو اوبو ډنډ کېدو له ګواښ سره مخ دي.






















