د تورکیې او قطر د دفاعي چارو مشرانو په ټیلیفون کې د دوه اړخیزو او سیمه ییزو امنیتي مسایلو په اړه داسې مهال خبرې وکړې، چې پر ایران د امریکا او اسرائیل بریدونه او د ایران ځوابي اقداماتو د خلیج هېوادونه او د هرمز تنګی اغېزمن کړي دي.
د تورکیې د ملي دفاع وزیر یاشار ګولر د قطر د لومړي وزیر له مرستیال او د دفاعي چارو له وزیر شیخ سعود بن عبدالرحمن آل ثاني سره ټیلیفوني خبرې وکړې.
د تورکیې د ملي دفاع وزارت د سه شنبې په ورځ په یوه اعلامیه کې وویل: "د دې اړیکې پر مهال دواړو خواوو د دوه اړخیزې او سیمه ییزې دفاع او امنیتي مسایلو په اړه د نظرونو تبادله وکړه."
دا ټیلیفوني اړیکه پر ایران د امریکا او اسرائیل د ګډو بریدونو له امله د رامنځته شوي سیمه ییز کړکېچ په ترڅ کې شوې ده. کړکېچ هغه مهال خورا زیات شو چې اسرائیل او امریکا د فبروري په ۲۸مه پر ایران ګډ بریدونه پیل کړل، چې تر اوسه پکې د ستر رهبر علي خامنه يي په ګډون شاوخوا ۱۳۰۰ کسان وژل شوي دي.
ایران د دغو بریدونو په غبرګون کې پر اسرائیل، اردن، عراق او د خلیج پر څو هغو هېوادونو چې د امریکا پوځي اډې پکې دي، د بې پیلوټه الوتکو او توغندیو بریدونه کړي دي. ایران همدارنګه د مارچ د لومړۍ نېټې په شاوخوا کې د هرمز تنګی هم په عملي ډول وتاړه. دا ستراتیژیکه اوبیزه لاره په نورمال ډول هره ورځ د ۲۰ میلیونه بیرله تېلو د لېږد او د نړۍ د طبیعي ګازو (LNG) د سوداګرۍ شاوخوا ۲۰ سلنه برخه اداره کوي.
