د تورکیې د کرنې او ځنګلونو وزیر ابراهیم یوماکلي اعلان وکړ چې له اسپانیا وروسته فرانسې هم د ځنګلونو د اور مړ کولو په برخه کې له تورکیې څخه د مرستې غوښتنه کړې، او دوه د اور وژنې الوتکې دغه هېواد ته لېږل شوې دي.
تورکیه په اروپا کې د هغو ځنګلي اورونو سره د مبارزې په چوکاټ کې چې له څو ورځو راهیسې دوام لري، له اسپانیا وروسته فرانسې ته هم هوایي مرسته چمتو کوي.
د کرنې او ځنګلونو وزیر ابراهیم یوماکلي پر خپلې ټولنیزې پاڼې په یوه خپاره کړي بیان کې ویلي چې د ولسمشر رجب طیب اردوغان په لارښوونه، د هغو دوو الوتکو وروسته چې مخکې هسپانیې ته لېږل شوې وې، اوس د فرانسې د ملاتړ غوښتنې پر بنسټ دغه هېواد ته هم دوه د اور وژنې الوتکې ولېږل شوې.
یوماکلي څرګنده کړه چې په اروپا کې د ځنګلونو روان اورونه یو ځل بیا دا ښيي چې له اور سره مبارزه څومره ستونزمنه ده. هغه ټینګار وکړ چې تورکیه د خپلو امکاناتو او تجربو په کارولو سره نه یوازې د خپلو ځنګلونو دفاع کوي، بلکې د اړتیا پر مهال د نورو هېوادونو د ځنګلونو ساتنې لپاره هم مسؤلیت پر غاړه اخلي.
نوموړي وویل چې تورکیې د اسپانیا وروسته د فرانسې د مرستې غوښتنې ته هم په لنډ وخت کې مثبت ځواب ورکړ. یوماکلي په پای کې وویل: "ځنګلونه موږ ته یوازې یو امانت نه دی؛ بلکې دا تر ټولو قیمتي میراث دی چې راتلونکو نسلونو ته یې پرېږدو. په همدې احساس، موږ به له پولو اخوا پیوستون او خپلې مبارزې ته په کلک هوډ سره دوام ورکړو."
