د ایران پر وړاندې د جګړې په لومړیو ۴ ورځو کې امریکا نږدې ۲ میلیارده ډالره پوځي تجهیزات له لاسه ورکړي
د اناتولیا خبري اژانس د ارقامو له مخې، د شنبې ورځې راهیسې پر ایران د امریکا د بریدونو په ترڅ کې، متحده ایالاتو نږدې ۲ میلیارده ډالره پوځي تجهیزات له لاسه ورکړي دي.
د دې مالي زیان تر ټولو لوی لامل په قطر کې د "العدید" په هوايي اډه کې د امریکا د AN/FPS-132 په نوم د لومړني خبرداري رادار سیسټم ویشتل دي، چې ۱.۱ میلیارده ډالره ارزښت لري. دا رادار د شنبې په ورځ د ایران په توغندیز برید کې په نښه شو. قطر تایید کړې چې رادار لګیدلی او زیانمن شوی دی.
د یکشنبې په ورځ، ۳ د F-15E Strike Eagles جنګي الوتکې د کویټ د هوايي مدافع ځواکونو په "خپلمنځي ډزو کې له منځه لاړې. که څه هم د الوتکو شپږ واړه پیلوټان ژوندي پاتې شول، خو الوتکې ویجاړې شوې چې د بیا ځای پر ځای کولو لګښت یې ۲۸۲ میلیونه ډالره اټکل شوی.
د شنبې په ورځ په لومړني غبرګون کې، ایران په بحرین کې د امریکا د پنځمې سمندري بیړۍ مرکزي دفتر په نښه کړ، چې دوه د سټلایټ مخابراتي ټرمینلونه او څو لویې ودانۍ یې ویجاړې کړې. د پرانیستو سرچینو د استخباراتي راپورونو له مخې، د ویشتل شویو ټرمینلونو ارزښت شاوخوا ۲۰ میلیونه ډالره دی.
ایران همدارنګه ادعا کړې چې په متحده عربي اماراتو کې یې د THAAD توغندیز سیسټم د AN/TPY-2 رادار برخه له منځه وړې ده. سټلایټي انځورونه ښيي چې برید شوی او دا رادار شاوخوا ۵۰۰ میلیونه ډالره ارزښت لري. په مجموع کې، ایران په سیمه کې د امریکا ۱.۹۰۲ میلیارده ډالره پوځي شتمنۍ زیانمنې کړې دي.
پر امریکایي اډو بریدونه:
ایران تر اوسه په منځني ختیځ کې لږ تر لږه اووه امریکایي پوځي سایټونه په نښه کړي دي: په بحرین کې د پنځمې بیړۍ مرکز، په کویټ کې عارفجان، علي السالم او بوهرینګ اډې، په عراق کې د اربیل اډه، په اماراتو کې د جبل علي بندر او په قطر کې د العدید اډه.
په سعودي عربستان، کویټ او متحده عربي اماراتو کې د امریکا ډیپلوماټیک ماموریتونه هم په نښه شوي:
· ریاض: د امریکا پر سفارت دوه ډرون بریدونه وشول چې پکې د سي آی اې (CIA) سټیشن هم لګیدلی دی.
· کویټ: پر سفارت د ډرون او توغندیو بریدونه وشول، چې له امله یې سفارت وتړل شو او د کارکوونکو کورنۍ وایستل شوې.
· دوبۍ: پر کونسلګرۍ د ډرون برید له امله په نږدې پارکینګ کې اور ولګید، خو ودانۍ ته لوی زیان نه دی رسیدلی.
