د ایران د رهبر ایةالله مجتبی خامنەیي سلاکار یحیی رحیم صفوي خبرداری ورکړی چې که امریکا پر دغه هېواد نوي بریدونه ترسره کړي، جګړه «تر هندي سمندرګي پورې» غځېدلی شي.
صفوي، د فارس خبري اژانس لخوا په خپره شوې وېډیو کې په خبرو کې وویل: «د دې خبرې په پام کې نیولو سره چې نښته دمګړۍ له پارس خلیج او د هرمز له تنګي څخه (د حوثیانو په ګډون سره) سرې سمندرګې ته غځېدلې ده، د یوه احتمالي جنګ په ځواب کې شونې ده چې دا جبهه نوره هم پراخه شي او تر هندي سمندرګي یا له هغه بل خوا پورې وغځېږي.»
ایراني چارواکو تر دې وړاندې هم خبرداری ورکړی و چې د امریکا د احتمالي بریدونو د بیا پیلېدو په صورت کې به د نښتې جغرافیا پراخه کړي.
خو دا لومړی ځل دی چې د ایران د رهبر یو سلاکار په روښانه توګه د هندي سمندرګي یادونه کوي؛ هغه سمندرګی چې په دیګو ګارسیا کې د امریکا او بریتانیا له ستراتیژیکې پوځي اډې کوربه توب کوي.
یمني حوثیانو چې د سعودي عربستان له ملاتړه برخمنو دولتي ځواکونو سره په جګړه کې دي، په دې وروستیو کې د سرې سمندرګې د یمن ساحلي کنټرول تر لاسه کړی او په دې توګه یې پر ستراتیژیک باب المندب تنګي — چې اسیا د سویز کانال له لارې له اروپا سره نښلوي — خپل تسلط او حاکمیت پیاوړی کړی دی.
ایران او د امریکا متحده ایالات د فبرورۍ پر ۲۸مه د نښتې له پیلېدو وړاندې، د هرمز تنګي د کنټرول لپاره چې خورا حیاني اقتصادي اهميت لري او د نړۍ کابو ۲۰ سلنه تېل ترې تېرېږي، په سیالۍ او جګړه کې وو.
د دواړو لوریو ترمنځ په جون میاشت کې په پاکستان کې د لاسلیک شوي تفاهم لیک له ناستې او د یوې میاشتې په ترڅ کې د هغې له پاشل کېدو وروسته خبرې اترې ټکني شوې؛ خو د دواړو هېوادونو چارواکو پدې اونۍ کې په نیویارک کې د ملګرو ملتونو عمومي اسامبلې په حاشیه کې لیدنې کړي دي.
ایران د خپلو اقتصادي بندیزونو د پورته کولو او په بهر کې د کنګل شوو شتمنیو د ازادولو په ګډون اووه شرایط وړاندې کړي دي.
