بېجېنګ امریکا  د سوداګریز کړکېچ په زیاتولو تورنوي او  د نادره خاورو له محدودیتونو دفاع کوي
د بېجېنګ دا څرګندونې وروسته له هغې کېږي چې ټرمپ د جمعې په ورځ ژمنه وکړه چې پر چینایي توکو به ۱۰۰ سلنه نوې تعرفې ولګوي او د 'حساسو سافټویرونو' صادرات به محدود کړي.

بېجېنګ د ټرمپ نوې امریکايي تعرفې "منافقانه" بولي او د نادره خاورو د صادراتو پر محدودیتونو دفاع کوي.

چین د امریکا د  ولسمشر ډونالډ ټرمپ له خوا پر چینایي توکو وروستۍ لګول شوې تعرفې منافقانه بللې او د نادره خاورو د صادراتو له محدودیتونو یې دفاع کړې، خو پر امریکايي توکو یې د نویو مالیو له لګولو ډډه کړې ده.

د چین د سوداګرۍ وزارت د یکشنبې په ورځ په یوه اعلامیه کې  د ټرمپ لخوا پر چینايي توکو د سل سلنې تعرفې لګول "حیرانوونکي" او "ډېر دښمنانه" وبلل. همداشان په اعلامیه کې د نادرو خاورو پر صاداراتو محدودیتونه  تېره میاشت په مادرید کې د دوه اړخیزو سوداګریزو خبرو راهیسې د امریکا د یو لړ اقداماتو په تعقیب لګول شوي دي.

بېجېنګ د بېلګې په توګه د امریکا په سوداګریز تور لیست کې د چینایي شرکتونو ورزیاتول او پر چینایي کښتیو د واشنګټن له خوا د بندري فیسونو لګول یاد کړل.

وزارت وویل: "دغو اقداماتو د چین ګټو ته سخت زیان رسولی او د دوه اړخیزو اقتصادي او سوداګریزو خبرو اترو فضا یې زیانمنه کړې ده. چین یې په کلکه مخالفت کوي."

بېجېنګ په ښکاره توګه د امریکا دغو اقداماتو ته د مهمو منرالونو پر صادراتو له خپلو محدودیتونو سره له تړاو ورکولو ډډه وکړه، او ویې ویل چې د دوی محدودیتونه "د پرله پسې پوځي شخړو" په وخت کې د دغو فلزاتو د پوځي کارونې په اړه د اندېښنو له امله دي.