د تورکیې ولسمشر رجب طیب اردوغان وویل چې د جولای په ۷مه او ۸مه په انقره کې د ناټو سرمشریزه به د "تجربو د شریکولو لپاره د تر ټولو پیاوړي پلیټ فارم" په توګه کار وکړي.
اردوغان د دوشنبې په ورځ په استانبول کې د ناټو د غړو هېوادونو د پارلماني رئیسانو په ویاړ په یوه مېلمستیا کې وویل چې انقره له خپلو متحدینو سره هم د "سیمه ییزو بحرانونو د مدیریت په برخه کې خپله استثنایي وړتیا" او هم په ایتلاف کې خپله پراخه تجربه شریکوي.
هغه زیاته کړه چې ترکیه خپله دفاعي بودیجه زیاتوي او د هغو ژمنو پر بنسټ چې د ۲۰۲۵ کال د هاګ په سرمشریزه کې شوې وې، دا هېواد د ناټو په ماموریتونو او عملیاتو کې د پنځو سترو ونډه لرونکو هېوادونو په ډله کې ځای لري.
اردوغان وویل چې په اوسنیو شرایطو کې د ناټو د مخنیوي ځواک ساتل او د متحدینو ترمنځ د پیوستون پیاوړي کول لا پسې حیاتي شوي دي.
نوموړي په ټول ناټو ایتلاف کې د یوې "بې قیده او شرطه" امنیتي او دفاعي شبکې د جوړولو غوښتنه وکړه، چې د ده په وینا "له ټیکساس څخه تر انقرې پورې غځېدلې وي."
د روسیې او اوکراین د جګړې په اړه اردوغان وویل چې په راتلونکي پړاو کې باید د دې شخړې د حل لپاره چې له ۲۰۲۲ کال راهیسې روانه ده، د خبرو اترو له لارې پایلې ترلاسه شي.
هغه ټینګار وکړ چې د فلسطین موضوع د منځني ختیځ د کړکېچونو په سر کې ده او تر هغه چې د اسرائیلو له خوا د ځمکو غصب پای ته ونه رسېږي، تلپاتې سوله ناممکنه ده.
