د عراق د دفاع وزارت: عراق د امریکايي ځواکونو له وتلو وروسته د عین الاسد هوايي اډې بشپړ کنټرول ترلاسه کړ
د امریکا په مشرۍ نړیوال ائتلاف په ۲۰۱۴ کال کې وروسته له هغې جوړ شو چې داعش ترهګرې ډلې موصل او د عراق پراخې سیمې ونیولې، ترڅو له دغې ډلې سره مبارزه وکړي.
د عراق د دفاع وزارت اعلان وکړ چې د عراق پوځ د انبار په لوېدیځ ولایت کې د امریکا په مشرۍ د ائتلافي ځواکونو له وتلو وروسته د عین الاسد هوايي اډې کنټرول ترلاسه کړ.
دغه وزارت د یکشنبې په ورځ وویل، وروسته له هغې چې د نړیوال ائتلاف ځواکونو دغه مرکز پرېښود، پوځ په رسمي توګه د اډې مدیریت په غاړه واخیست.
د دولتي خبري آژانس INA د راپور له مخې،د عراق لوی درستیز جنرال عبدالامیر رشید یارالله له سیمې څخه لیدنه وکړه ترڅو د اډې له سپارلو وروسته د عراقي واحدونو ترمنځ د دندو او مسؤلیتونو وېش وڅاري.
د امریکا په مشرۍ نړیوال ائتلاف په ۲۰۱۴ کال کې د داعش ترهګرې ډلې سره د مبارزې لپاره وروسته له هغې جوړ شو چې دغې ډلې موصل او د عراق پراخې سیمې ونیولې.
د عین الاسد هوايي اډې سربېره، ائتلافي ځواکونو معمولاً په بغداد کې له یوې مرکزي اډې، په اربیل کې له مرکزونو او بېلابېلو روزنیزو کمپونو څخه هم خپل فعالیتونه ترسره کول.
