میرټس د المان په پلازمېنه برلین کې د اروپايي ټولنې  د شورا له رئیس انتونیو کوسټا سره له کتنې وروسته په ګډ مطبوعاتي کنفرانس کې وینا کوله.

میرټس اوکراین ته د امریکايي پلاوي سفر ته په اشارې سره وویل چې "موږ په اوسني وخت کې د داسې نښو شتون ډېر لږ وینو چې ګواکې د روسیې حکومت او د روسیې ولسمشر د جګړې پای ته رسولو لپاره جدي خبرو اترو ته چمتو وي."

میرټس وویل چې هغوې له خپلو شته امکاناتو د ډیپلوماتیکو حل لارو په خاطر کار اخیستی ، خو  " ترڅو چې د روسیې حکومت د خبرو اترو، مذاکرې او ډیپلوماټیکې حل لارې ټولې غوښتنې رددوي او ځان ترې لرې نیسي، زه په اوسني وخت کې د دې پروسې د تطبیق چانس خورا کم وینم."

نوموړي د ډیپلوماټیکې حل لارې لپاره د هڅو د دوام پر اړتیا ټینګار وکړ او ویې ویل د اوکراین ملاتړ لپاره چې هرڅه ترسره کېږي د جګړې د دوام لپاره نه، بلکې د هغې د پای ته رسولو په پار دي.

میرټس د یوه خبریال د پوښتنې په ځواب کې، د المان په سکسونیا-انهالټ ایالتي ټاکنو کې د المان لپاره بدیل ګوند له بریا وروسته د دغه ګوند د ممنوعیت په اړه د پلټنو د بحثونو ارزونه وکړه او څرګنده کړه چې د داسې پروسې پر بریا شک لري.

میرټس وویل: "زه فکر نه کوم چې د دغه ګوند په منع کولو سره به ستونزه حل شي،" او زیاته یې کړه چې له AfD ګوند سره باید لومړیتوب سیاسي مبارزې ته ورکړل شي.

میرټس همدا راز وویل: "کوم څوک چې د المان د اروپايي ټولنې په غړیتوب شک کوي، له اروپايي ټولنې، یورو اسعارو او شینګن سیمې وتل غواړي، د ټولنې د هوساینې او رفاه یوه مهمه برخه له خطر سره مخ کوي." او ټینګار یې وکړ چې د اروپايي ټولنې د پرمختګ لپاره به ټولې هڅې وکړي.

د اروپايي ټولنې د شورا رئیس کوسټا هم څرګنده کړه چې د اوکراین جګړې له پیل راهیسې د یوه عادلانه او تلپاتې سولې لپاره مبارزه کوي او زیاته یې کړه: "د جګړې د نه ختمېدو یوازینی علت دا دی چې روسیه ورته چمتو نه ده."

 کوسټا پر دې پر ټینګار سره چې روسیه باید جګړې پای ته رسولو، د اوربند اعلان او د خبرو اترو مېز ته کښېناستلو ته مجبوره شي، د ټولو هغو مذاکراتي هڅو د ملاتړ ډاډ ورکړ چې موخه یې همدا ده، او ویې ویل: "د سولې وخت رارسېدلی او روسیه باید جګړه ختمه کړي."

کوسټا په خپلو خبرو کې دا نقطه هم زیاته کړه چې دا باید یوه عادلانه او تلپاتې سوله وي.