د ایران ستر مشر، علي خامنه اي، د پنجشنبې په ورځ د امریکا له خوا د اسرائیل او ایران ترمنځ د جګړې د پای ته رسولو لپاره د اوربند د اعلان وروسته خپله لومړۍ عامه وینا وکړه.

هغه وویل چې ایران په اسرائیل باندې بریا ترلاسه کړه. "د ټولو هغو ادعاوو او شورماشور سره سره، د صهیونستي رژیم، د اسلامي جمهوریت د ګوزارونو لاندې، نږدې سقوط کړی او مات شوی دی،" د ایران خلکو ته د  خامنه اي دا تلویزیوني پیغام د هغه په رسمي پاڼه کې خپور شو.

هغه زیاته کړه: "زه د دروغجن صهیونستي رژیم په وړاندې د بریا مبارکي وایم."

خامنه اي په یوه بیان کې چې د دولتي رسنیو لخوا خپور شو، وویل: "صهیونستي رژیم د اسلامي جمهوریت د ګوزارونو لاندې نږدې سقوط کړی او مات شوی دی."

هغه د ایران د اټومي تاسیساتو پر وړاندې د بریدونو لپاره په امریکا نیوکه وکړه او وویل چې ایران به هیڅکله امریکا ته تسلیم نه شي.

هغه وویل چې امریکا د اسرائیل سره د جګړې پر مهال له خپلو بریدونو څخه "هیڅ ګټه نه ده ترلاسه کړې."

خامنه اي په یوه بیان کې چې د دولتي رسنیو لخوا خپور شو، وویل: "امریکا په جګړه کې مستقیم ګډون وکړ، ځکه چې دوی ډاډه وو چې که مداخله ونه کړي، نو صهیونستي رژیم به په بشپړ ډول له منځه ولاړ شي."

"امریکا له دې جګړې څخه هیڅ ګټه نه ده ترلاسه کړې،" خامنه اي د واشنګټن په اړه وویل، او زیاته یې کړه: "اسلامي جمهوریت بریالی شو او په بدل کې یې امریکا ته سخت ګوزار ورکړ، او ټرمپ هڅه کوي حقیقت پټ کړي."

هغه وویل: "د امریکا ولسمشر په خپلو څرګندونو کې اشاره وکړه چې ایران باید تسلیم شي. تسلیم شي! دا نور د غني کولو یا د اټومي صنعت خبره نه ده، بلکې د ایران د تسلیمیدو خبره ده."

"داسې یو څه (تسلیمیدل) به هیڅکله ونه شي. دا به هیڅکله ونه شي."

د ایران د ستر مشر د لومړۍ وینا لږ وروسته، د اسرائیل لومړي وزیر بنیامین نتنیاهو یو پیغام خپور کړ چې پکې د هغه او ټرمپ د لاس نیولو عکس هم شامل و.

نتنیاهو وویل چې هغه به د امریکا له ولسمشر ډونالډ ټرمپ سره کار ته دوام ورکړي ترڅو "زموږ ګډ دښمنان مات کړي، زموږ یرغمل شوي کسان آزاد کړي، او د سولې دایره په چټکۍ سره پراخه کړي."