مکسیکو کې په یوه سوپر مارکېټ کې چاودنې لږ تر لږه ۲۳ کسان وژلي دي
د سونورا ایالت والي وايي: "له بده مرغه، یو شمېر قربانیان چې موږ موندلي، ماشومان وو."
د ځايي چارواکو په وینا، د شنبې په ورځ د مکسیکو په شمال کې په سونورا ایالت په یو سوپر مارکېټ کې چاودنې لږ تر لږه ۲۳ کسان وژلي او ۱۱ نور یې ټپیان کړي دي.
د سونورا ایالت والي، الفونسو دورازو، د تلفاتو د شمیر د اعلانولو پر مهال وویل چې له بده مرغه، یو شمېر قربانیان چې موږ موندلي، ماشومان وو."
دورازو وویل چې ژوندي پاتې شوي کسان د هرموسیلو ښار په روغتونونو کې تر درملنې لاندې دي، چېرې چې دا چاودنه رامنځته شوې ده.
هغه وویل: "ما د پراخو او شفافو پلټنو امر کړی دی ترڅو د پېښې لاملونه معلوم او مسؤلین یې په ګوته شي."
دا چاودنه د ښار په مرکز کې د والډوز په نوم په یوه سوپر مارکیټ کې رامنځته شوه.
د عامه امنیت ځايي چارواکو پر ملکي وګړو یو "برید" یا "له تاوتریخوالي سره تړلې پېښه" رد کړې ده.
د مکسیکو ولسمشرې کلاودیا شینبام پر اېکس شبکه "د وژل شویو کسانو له کورنیو او خپلوانو سره" خپله خواخوږي څرګنده کړه.
