د یونان د ورځپاڼې کاتیمیریني په وینا، د دوشنبې په ورځ د یونان د ساموس ټاپو په شمال کې د ایجین سمندر کې د کډوالو د لیږدونکې چټکې کښتۍ د ډوبیدو له امله لږ تر لږه شپږ کډوال مړه او ۱۴ نور ژغورل شوي دي.
دا د ورځې دویمه ورته پیښه وه، ځکه چې شپږ کډوال مخکې د لیسوس ټاپو ته نږدې مړه شوي وو.
د یونان ساحلي ساتونکو د پېښې له رامنځته کېدو وروسته د لټون او ژغورنې عملیات پیل کړل. دا پېښه د ساموس ټاپو په شمال کې شاوخوا ۳.۷ سمندري میله لرې رامنځته شوې ده.
شپږ قربانیان، چې جسدونه یې موندل شوي، پنځه نارینه او یوه ښځه پکې شامله وه، پداسې حال کې چې ټول ۱۴ ژوندي پاتې شوي نارینه وو.
کښتۍ، چې په ډېر لوړ سرعت روانه وه، د یوه ناڅاپي او تېز حرکت له امله چپه شوه، چې ورپسې د لټون او ژغورنې عملیات پیل شول.
د ساحلي ساتونکو یوه سمندري ګزمه یې بېړۍ، یوه ژغورونکې کښتۍ او د هوايي ځواک یوه چورلکه سیمې ته واستول شول، ترڅو د احتمالي ورکو شویو کسانو لټون وکړي.
دا پېښه د دوشنبې په ورځ د لیسبوس ټاپو ته څېرمه د یوې بلې مرګونې کښتۍ د ډوبېدو وروسته رامنځته شوه، کله چې د یونان د ساحلي ساتونکو د کښتۍ سره د یوې چټکې کښتۍ د ټکر له امله د یوه ماشوم په ګډون شپږ کډوال مړه شول.
په هغه پېښه کې اته کسان ژغورل شوي وو.
