د ایران د ستر مذهبي مشر یوه لوړپوړي سلاکار د هر ډول نوې شخړې په وړاندې د لا سخت ځواب خبرداری ورکړی او د لبنان امنیت یې په سیمه کې له روانو خبرو اترو او د اوربند له نازکو هڅو سره تړلی وباله.
د ایران د ستر مذهبي مشر علي خامنئي یوه لوړپوړي نظامي سلاکار، محسن رضايي، د پنجشنبې په ورځ وویل چې د بیروت پر جنوبي څنډو د اسرائیلو د ګواښونو په ځواب کې توغندي توغولو ته چمتو دي. هغه ټینګار وکړ چې تهران په سیمه کې د کړکېچ په زیاتېدو سره د حزب الله ملاتړ ته دوام ورکوي.
محسن رضايي له ایراني دولتي ټلویزیون سره په خبرو کې پر اسرائیلو تور پورې کړ چې په لبنان کې د فشار له تاکتیکونو کار اخلي ترڅو په هغو خبرو اترو کې امتیازات ترلاسه کړي چې ایران هم پکې ښکېل دی. هغه خبرداری ورکړ چې لبنان به په راتلونکي کې د هر ډول سیمه ئیز جوړجاړي په مرکز کې وي او له خپلو متحدینو سره یې د تهران پر ملاتړ یو ځل بیا ټینګار وکړ.
رضايي زیاته کړه چې له حزب الله څخه د ایران ملاتړ د "سټراټیژیک اعتبار" خبره ده او وې ویل چې که جګړه بیا پیل شي، د اسرائیلو شمالي برخې به له داسې شرایطو سره مخ شي چې تر تېرې ۴۰ ورځنۍ جګړې به "ډېر سخت" وي.
د هرمز تنګی او کنګل شوې پیسې د فشار اصلي ټکي پاتې دي
رضايي د هرمز تنګی د ایران تر کنټرول لاندې یو پیاوړی "مخنیونکی ځواک" وباله او ویې ویل چې دا لاره باید د سوداګرۍ پر مخ خلاصه وي، خو د نظامي فشار لپاره ونه کارول شي. نوموړي د ایران د لږ تر لږه ۲۴ میلیارده ډالرو کنګل شوې پانګې د خوشې کولو غوښتنه هم وکړه او ویې ویل چې دا ګام به په ډیپلوماټیکو هڅو کې د باور جوړولو سره مرسته وکړي.
دا څرګندونې په داسې حال کې کېږي چې د روان کال په پیل کې پر ایران د امریکا او اسرائیلو له بریدونو وروسته سیمه کې کړکېچ خورا زیات شو. دغو بریدونو د تهران غبرګوني بریدونه او د هرمز تنګي لنډمهاله تړل کېدل له ځان سره درلودل. که څه هم د اپریل په میاشت کې د پاکستان په منځګړیتوب یو اوربند رامنځته شو، خو د یوې جامع هوکړې لپاره خبرې اترې لا هم نازکې دي.
په لبنان کې، د اپریل له نیمایي راهیسې د اوربند له اعلان سره سره بیا هم جګړې دوام لري. د بیروت شاوخوا ته د اسرائیلو بریدونو او د یرغل د پراخولو ګواښونو دا اندېښنې پیدا کړې دي چې کېدای شي جګړه یو ځل بیا پراخه شي، که څه هم د امریکا په مشرۍ ډیپلوماټیکې هڅې د اوربند د ساتلو لپاره روانې دي.
