د اټومي خبرو له ناکامۍ وروسته پر ایران د ملګرو ملتونو هر اړخیز بندیزونه بیا ولګول شول
فرانسې، برتانیا او جرمني ایران باندې د بیا لګول شویو بندیزونو په غبرګون کې د هر ډول اقدام په اړه خبرداری ورکړ.
اټومي خبرو له ناکامۍ وروسته پر ایران د ملګرو ملتونو هر اړخیز بندیزونه بیا لګول شوي او ورسره سم فرانسې، برتانیا او جرمني تهران ته د "پاروونکو اقداماتو" د نه کولو خبرداری ورکړی دی.
دغو درېیو اروپايي هېوادونو، چې د E3 په نوم پېژندل کېږي، د بهرنیو چارو وزیرانو د یکشنبې په ورځ په یوه ګډه اعلامیه کې وویل: "د ملګرو ملتونو د بندیزونو بیا لګول د دیپلوماسۍ پای نه دی."
هغوی وویل: "موږ له ایران څخه غوښتنه کوو چې له هر ډول پاروونکي اقدامه ډډه وکړي او خپلو قانوني او الزامي ژمنو ته بېرته غاړه کېږدي."
پر ایران د بندیزونو بېرته لګول دغو درېیو هېوادونو د ملګرو ملتونو په امنیت شورا کې (جرمني د نورو دوو له لارې) د هغو تورونو پر بنسټ پیل کړل، چې ګواکې دغه هېواد د ۲۰۱۵ کال هغه تړون نقض کړی، چې موخه یې د اټومي بم له جوړولو څخه د ایران منع کول وو.
ایران د اټومي وسلو د ترلاسه کولو هڅې ردوي.
