د پاکستان د بهرنیو چارو وزیر محمد اسحاق ډار ویلي چې د سیمهییزې همکارۍ په برخه کې د پرمختګ لپاره، افغانستان باید د ترهګرۍ د ګواښ په ګډون د خپلو ګاونډیانو امنیتي اندېښنو ته رسېدنه وکړي.
ډار په پلازمېنه اسلاماباد کې د اقتصادي همکارۍ سازمان (ECO) د وزیرانو شورا په ۳۰مه غونډه کې له افغانستان سره د اړیکو په اړه څرګندونې وکړې.
ډار وویل چې پاکستان غواړي یو «سولهییز، سوکاله او باثباته» افغانستان وویني، او زیاته یې کړه چې یو داسې افغانستان چې له خپل ځان او ګاونډیانو سره په سوله کې وي او په بشپړه توګه د ECO په چوکاټ کې مدغم شوی وي، هم به د خپل ولس او هم به د سیمې په ګټه وي.
نوموړي وویل: «په ورته وخت کې، د پام وړ پرمختګ دې ته اړتیا لري چې افغان چارواکي د خپلو ګاونډیانو امنیتي اندېښنې، په ځانګړې توګه د ترهګرۍ ګواښ حل کړي.» ډار د سیمهییزو اقتصادي مشارکتونو د پایښت لپاره د یوه امن او باثباته چاپېریال پر اهمیت ټینګار وکړ.
ډار زیاته کړه: «ناحل شوي اختلافات او د نړیوالو ژمنو نه پوره کول کولای شي دغه باور ته زیان ورسوي او اقتصادي بهیر له خنډ سره مخ کړي.»
نوموړي دې ته په اشارې سره چې دوی د سوداګرۍ او پانګونې د لمنې پراخولو، د سیمهییزو اړیکو د پیاوړتیا او د ECO د سوداګرۍ تړون د پراختیا په څېر موخې لري، ټینګار وکړ چې د اقتصادي ودې لپاره په سیمه کې ثبات اړین دی.
ډار همداراز یادونه وکړه چې د ایران پر وړاندې د امریکا او اسرائیلو له بریدونو څخه د پیل شوې جګړې د پای ته رسولو لپاره د دوی ډیپلوماتیکې هڅې روانې دي.




















