د اوکراین ولسمشر ولادیمیر زیلینسکي له رویټرز خبري اژانس سره په مرکه کې ویلي چې متحده ایالاتو په اوکراین کې د سولې د هوکړې لپاره د امنیتي تضمینونو وړاندیز په دې شرط کړی چې کییف د ډونباس ټوله ختیځه سیمه روسیې ته پرېږدي.

زیلینسکي وویل واشنګټن پر اوکراین فشار راوړي ځکه چې غواړي هغه جګړه چې په ۲۰۲۲ کال کې پیل شوې ژر پای ته ورسوي، او په منځني ختیځ کې جګړه د امریکا پر لومړیتوبونو اغیز کوي. هغه وویل: "منځنی ختیځ خامخا پر ولسمشر ټرمپ اغیز لري... هغه لا هم پر اوکرایني لوري د ډیر فشار اچولو ستراتیژي غوره کوي."

متحده ایالاتو، روسیې او اوکراین سږ کال په ابوظبۍ او جنیوا کې د درې اړخیزو خبرو اترو درې پړاوونه ترسره کړي دي. زیلینسکي وویل دوه مهمې مسلې لا هم نا حل شوې پاتې دي: څوک به د اوکراین پوځي اړتیاوې تمویلوي او متحدین به د روسیې راتلونکي تیري ته څنګه ځواب ووایي.

هغه وویل: "امریکایان چمتو دي چې دا تضمینونه په لوړه کچه هغه وخت وروستي کړي کله چې اوکراین له ډونباس څخه وتلو ته چمتو وي."

روسیې ټینګار کړی چې پر ډونباس بشپړ کنټرول د هغې د جګړې د اهدافو مرکزي برخه ده، که څه هم شنونکي وايي چې د هغوی پرمختګ سست دی. زیلینسکي خبرداری ورکړ چې وتل به اوکراین او اروپا کمزوري کړي. هغه وویل: "زه ډیر غواړم چې امریکایي لوری په دې پوه شي چې زموږ د هیواد ختیځه برخه زموږ د امنیتي تضمینونو برخه ده."

نامعلوم برخلیک
د خبرو اترو څلورم پړاو د ایران د جګړې له امله وځنډول شو. زیلینسکي وویل روسیه پر دې شرط لګوي چې که مذاکرات وځنډیږي واشنګټن به ورسره علاقه له لاسه ورکړي.

هغه د مهمو مسلو د حل لپاره د امریکا له ولسمشر ډونالډ ټرمپ او د روسیې له ولسمشر ولادیمیر پوتین سره د یوې سرمشریزې غوښتنه وکړه. هغه وویل: "زه د چاکلیټو بکس نه یم... د متحده ایالاتو ولسمشر دې ته ډیر واقعبینانه ګوري."

هغه همدا راز له واشنګټن څخه د پیټریوټ (Patriot) توغندیو سیسټمونو د دوامداره رسولو له امله مننه وکړه، که څه هم هغه وویل چې دا اکمالات لا هم کافي نه دي.