د ګامالیا څېړنیز انسټیټیوټ علمي مدیر الکساندر ګینزبورګ، چې د دغه واکسین په جوړولو کې یې رول درلود، وویل چې د یوه ۶۰ کلن ناروغ درملنه روانه ده چې د میلانوما په درېیم پړاو اخته دی او لومړی ډوز یې د اپریل په میاشت کې اخیستی و.

ګینزبورګ یادونه وکړه چې په ترسره شویو ازموینو کې د ناروغ بدن د تومور او میټاسټاسیس (نورو غړو ته د سرطان خپرېدل) سره د مبارزې لپاره اړین فعال مرکبات تولید کړي او معافیتي غبرګون خورا مثبت و.

د روسیې د روغتیا وزارت تېر کال د میلانوما د پرمختللي پړاو لپاره د "Neooncovac" په نوم د mRNA پر بنسټ د واکسین او د کولوریکټل (د کولمو) سرطان لپاره د "Oncopept" په نوم د پیپټایډ درملو کارولو اجازه ورکړې وه.

د ګامالیا انسټیټیوټ چارواکو اعلان وکړ چې د میلانوما شخصي شوی واکسین به په نږدې راتلونکي کې د ۱۰ نورو ناروغانو لپاره هم چمتو شي او تولید به یې له یو څخه تر دریو میاشتو پورې بشپړ شي.

د جنیټیکي تحلیل له لارې شخصي تولید

په دې طریقه کې، د دې پرځای چې ناروغي په مستقیم ډول تداوي شي، هدف دا دی چې د بدن معافیتي سیسټم ته وروښودل شي چې د سرطان حجرې وپېژني او له منځه یې یوسي. په دې پروسه کې د ناروغ له تومور او روغې نسج څخه د اخیستل شویو نمونو جنیټیکي جوړښت تحلیل کیږي؛ د ترلاسه شویو معلوماتو په رڼا کې یوازې د همغه اړوند کس لپاره ځانګړی واکسین تولیدیږي.

د روسیې د ملي طبي راډیولوژي د څېړنیز مرکز مشر، اندري کاپرین وویل چې دا ټیکنالوژي د سرطان په درملنه کې یو بنسټیز نوی چلند وړاندې کوي.

له بلې خوا، ویل شوي چې هغه ناروغان چې د "Oncopept" درملنه یې ترلاسه کړې، هم لازم معافیتي غبرګون ښودلی دی. همدارنګه د ګامالیا انسټیټیوټ د پانقراس، پښتورګو او د سږو د ځینو ډولونو (non-small cell lung cancer) سرطان د درملنې په اړه خپلې څېړنې روانې ساتلې دي.