په بنګلادیش کې د هوايي ځواکونو اړوند د یوې روزنیزې الوتکې د سقوط له امله د مړو شمیره ۲۷ تنو ته لوړه شوه.

د بنګلادیشي مقاماتو په وینا  دا پیښه پرون دوشنبه په پلازمینه ډاکه کې رامنځته شوه.

ویل کیږي د بنګلادیش د هوايي ځواکونو اړوند یوه روزنیزه الوتکه په پلازمینه ډاکه کې د یو کالج په انګړ کې ولویده.

په پیښه کې لږ تر لږه ۲۷ تنو ژوند د لاسه ورکړی او ۱۷۰ تنه نور ټپيان شوي دي.

ویل کیږي پدې پیښه کې د وژل شوو ۲۷ تنو څخه يي ۲۵ تنه ماشومان دي  او یو هم د الوتکې پیلوټ دی.

دا خبره د بنګلادیش د روغتیا وزارت یو تن چارواکي سید رحمان وکړه.

هغه وویل چې ددې پیښې ۷۸ تنه ټپیان په مختلفو روغتونونو کې د تداوۍ لاندې دي چې د ډیرو روغتیايي حالت ښه ندی.

د بنګله دیش پوځ د دوشنبې په ورځ وویل چې پیلوټ، توقیر اسلام، په یوه عادي روزنیز ماموریت بوخت وو چې  "د راپورونو له مخې د الوتکې په انجن کې د تخنیکي ستونزې له امله الوتکې سقوط وکړ".

په یوه بیان کې ویل شوي چې "دقیق لامل یې تر څیړنې لاندې دی."

پوځ زیاته کړه چې پیلوټ هڅه وکړه چې الوتکه له ګڼ میشتو سیمو څخه لرې کړي، مګر "د هغه د غوره هڅو سره سره"، د ښوونځي دوه پوړیزه ودانۍ سره وجنګیده.

د محمد یونس لنډمهاله حکومت اعلان وکړ چې سه شنبه به د ملي ماتم ورځ وي.

یونس د X په یوه پوسټ کې د پیښې په اړه "ژور غم او خواشیني" څرګنده کړه.

هغه وویل: "د هوایي ځواک، زده کونکو، والدینو، ښوونکو او د مایلسټون ښوونځي او کالج کارمندانو او همدارنګه د دې پیښې څخه اغیزمن شوي نورو ته زیان نه جبرانیدونکی دی.""دا د ملت لپاره د ژور درد شیبه ده."