کارولين ليويټ، چې د ولسمشر ټرمپ د سپينې ماڼۍ مطبوعاتي سکرتره ده، په خپل ټولنيز حساب "ایکس" کې ليکلي: "نن سهار په دوحه کې د ناشتې پر مهال زما ګارسون راته وويل چې د ولسمشر ټرمپ څخه د هغه په استازيتوب مننه وکړم. ما ترې وپوښتل چې ولې؟ هغه راته وويل چې دی د کشمير اوسېدونکی دی او د هند او پاکستان د شخړې له امله په دې وروستيو کې خپل کور ته نه دی تللی."

هغې زياته کړه چې دغه کس اوس خبر شوی چې د ولسمشر ټرمپ په منځګړيتوب د اوربند له امله اوس خپل کور ته تللی شي.

د سپينې ماڼۍ د چارواکو په وينا، د کشميري اصل دغه کس ويلي: "ولسمشر ټرمپ د دې لپاره کافي ستاينه نه ترلاسه کوي چې هغه په رښتيا سره د يوې اټومي جګړې مخه ونيوله — او دا خبره سمه ده! ولسمشر ټرمپ په نړۍ کې ډېرې شخړې میراثي شخړو په حلولو پيل کړی دی.

هغې د ټرمپ د منځني ختيځ پاليسي هم وستايله او ويې ويل: "دا تاريخي سفر منځني ختيځ ته د امريکا بهرنۍ پاليسۍ کې يو مهم بدلون دی چې بالاخره به د منځني ختيځ د زرينې دورې پيل وکړي! سوله د ځواک له لارې بېرته راوستل کېږي!"

د مې په ۱۲مه، ولسمشر ډونالډ ټرمپ وويل چې د امريکا مداخلې د هند او پاکستان ترمنځ د يوې "بدې اټومي جګړې" مخه ونيوله، وروسته له هغې چې د جنوبي اسيا دواړو سيالانو د يو لړ نښتو وروسته د اوربند پرېکړه وکړه.

ټرمپ د سپينې ماڼۍ خبريالانو ته وويل: "موږ د يوې اټومي شخړې مخه ونيوله. زما په فکر دا يوه بده اټومي جګړه کېدای شوه؛ ميليونونه خلک وژل کېدای شول. نو زه په دې ډېر وياړم."

هغه زياته کړه چې متحده ايالات چمتو دي چې له هند او پاکستان سره د سوداګرۍ په برخه کې مرسته وکړي. هغه وويل چې سوداګري د دې يو لوی دليل دی چې دوی جګړه بنده کړه. په داسې حال کې چې پاکستان په ښکاره د ټرمپ د رول ستاينه کړې ده، هند لا تر اوسه د امريکا د مداخلې په اړه څه نه دي ويلي.