یو جګپوړی امریکايي چارواکي وویل که نتنیاهو د غزې تړون مات کړي او له تړونه ووځي، ټرمپ به یې "خراب" کړي .
د اسرائیلو لومړی وزیر د لویدیځې غاړې د الحاق په اړه د (پارلمان) له خوا د لایحو تر پرمختګ وروسته د ټرمپ سره "پر ډېره نرۍ رسۍ روان دی.
د اسرائیلو د ۱۲ چینل د راپور له مخې، یوه جګپوړي امریکايي چارواکي د اسرائیلو لومړي وزیر بنیامین نتنیاهو ته سخت خبرداری ورکړی چې که هغه د اسرائیلو او حماس ترمنځ د اوربند تړون د ناکامۍ لامل شي، نو د امریکا د ولسمشر ډونالډ ټرمپ له سختو پایلو سره به مخ شي.
د اکسیوس خبریال په ۱۲ چینل کې په عبراني ژبه وویل، دغه امریکايي چارواکي هغه ته خبرداری ورکړی چې نتنیاهو "د ولسمشر ټرمپ سره پر ډېره نرۍ رسۍ روان دی. که هغه دې کار ته دوام ورکړي، نو په پای کې به تړون ګډوډ کړي، او که هغه تړون ګډوډ کړي، ډونالډ ټرمپ به یې خراب کړي."
دا څرګندونې په داسې حال کې کیږي چې د واشنګټن او تل ابیب ترمنځ د اسرائیلو د پارلمان، کنیست، له خوا د اشغال شوې لویدیځې غاړې د ځینو برخو د الحاق اړوند قوانینو د پرمختګ پر سر تاوتریخوالی زیات شوی دی.
د راپور له مخې، د امریکا مرستیال ولسمشر جې ډي وانس، چې د پنجشنبې په ورځ یې اسرائیلو ته خپل دیپلوماتیک سفر پای ته ورساوه، وروسته له هغه حیران شو کله چې خبر شو چې کنیست یوه ورځ مخکې د الحاق اړوند دوه غیر لازمي لایحو ته لومړنۍ رایه ورکړې ده.
وانس د تل ابیب په بن ګوریون هوايي ډګر کې خبریالانو ته د تګ پر مهال پر دې رایې نیوکه وکړه او ویې ویل: "که دا یو سیاسي نمایش و، نو دا یو ډېر احمقانه کار و. زه شخصاً له دې څخه سپکاوی احساسوم."
د اسرائیلو اقدام ټرمپ په غوسه کړ
یوه اسرائیلي چارواکي ۱۲ چینل ته ویلي چې نتنیاهو ته څو ورځې وړاندې د داسې اقدام د سخت غبرګون په اړه خبرداری ورکړل شوی و، خو د رایې ورکولو د مخنیوي لپاره یې هیڅ ونه کړل.
د اسرائیلو پارلمان د الحاق اړوند دواړه لایحې په لومړني لوست کې تصویب کړې، چې د قانون کیدو لپاره درې نورو رایو ته اړتیا لري.
دا قانون د ولسمشر ټرمپ له ښکاره مخالفت سره سره پرمخ ولاړ، چې تېره میاشت یې ویلي و چې هغه به "اسرائیلو ته اجازه ورنکړي چې لویدیځه غاړه الحاق کړي."
دا رایه ورکول د وانس د سفر سره هم مهاله وو، چې د امریکا د هغې پراخې دیپلوماتیکې هڅې یوه برخه وه چې د اکتوبر په ۱۰ مه نافذ شوی د غزې اوربند وساتي.
