د اودیسا، چرنومورسک او یوژني بندرونه د صادراتو هغه مهم مرکزونه دي چې اوکراین ترې نړۍوالو بازارونو ته خپل کرنیز محصولات، په ځانګړي ډول غله جات لېږدوي.
په توره بحیره کې د اوکراین د اودیسا، چرنومورسک او یوژني په بندرونو کې د سوداګریزو کښتیو تګ راتګ په سیمه کې د روسیې د وروستیو زیاتېدونکو بریدونو له امله ودرېد.
د کښتیو د څارنې ادارې د معلوماتو له مخې، د جولای تر ۲۳مې پورې د اوکراین په دغو درېیو اصلي بندرونو کې هېڅ سوداګریزه کښتۍ نشته. د اوکراین د کرنې او خوراکي توکو وزیر "تاراس ویسوتسکي" هم خبر ورکړی چې ټرانسپورټي شرکتونو د جولای له ۲۲مې راهیسې د دغه هېواد د تورې بحیرې له بندرونو سره کار کول په لنډمهاله توګه درولي دي؛ هغه وویل چې دا پرېکړه د امنیتي لاملونو له امله شوې ده.
د ډنمارک د بار وړلو نړۍوال شرکت هم اعلان کړی چې د اوسنیو شرایطو له امله یې د چرنومورسک له لارې اوکراین ته خپل خدمتونه په موقتي ډول ځنډولي دي. دغه شرکت ویلي چې هغه وارداتي بارونه چې ټاکل شوې وه په چرنومورسک کې کښته شي، اوس به د رومانیا "کوسټنټا" بندر ته واستول شي. همدارنګه د صادراتو شته فرمایشونه په وړیا ډول لغوه کېدای شي او یا یې د بارولو ځای کوسټنټا ته بدلېدای شي.
د روسیې د دفاع وزارت بیا په یو بیان کې ادعا کړې چې پر اودیسا او چرنومورسک په وروستیو بریدونو کې یې د بندرونو هغه تاسیسات، ګودامونه او کښتۍ په نښه کړې چې د اوکراین پوځ ته د نظامي تجهیزاتو او تېلو په لېږد کې کارول کېدل.
اوکراین استدلال کوي چې دا بریدونه د سوداګریزو کښتیو تګ راتګ او د کرنیزو محصولاتو صادرات په نښه کوي، خو روسیه ادعا کوي چې دوی پر هغو تاسیساتو بریدونه کوي چې د نظامي موخو لپاره کارول کیږي. د اودیسا، چرنومورسک او یوژني بندرونه د صادراتو هغه اصلي مرکزونه دي چې نړۍ ته ترې د اوکراین غله جات صادریږي.
بل لور ته، اوکراین هم په دې وروستیو کې د روسیې پر هغو کښتیو او بندري تاسیساتو بریدونه زیات کړي چې په تورو اوبو او "ازوف" سمندرګي کې د لوژستیکي چارو لپاره کارول کیږي.
