سپینې ماڼۍ ویلي، د نوبل کمیټې لخوا د ټرمپ له پامه غورځول "پر سوله د سیاست غوره والی" و

سپینې ماڼۍ د نوبل جایزې د کمیټې پر هغې پرېکړې نیوکه کړې چې د امریکا د ولسمشر ډونالډ ټرمپ پر ځای یې د سولې جایزه د وینزویلا د اپوزیسیون یوې څېرې ته ورکړه.

د سپینې ماڼۍ ویاند سټیون چیونګ د جمعې په ورځ پر "X" ټولنیزه شبکه په یوه پیغام کې وویل: "ولسمشر ټرمپ به د سولې تړونونو ته دوام ورکړي، جګړې به پای ته ورسوي او ژوند به وژغوري. هغه د یو بشردوست په څېر زړه لري، او هېڅکله به د هغه په څېر بل څوک نه وي چې د خپلې ارادې په ځواک غرونه له ځایه وخوځوي."

"د نوبل کمیټې ثابته کړه چې دوی سیاست ته پر سوله لومړیتوب ورکوي."

د ناروې د نوبل کمیټې دا کلنۍ جایزه د وینزویلا ماریا کورینا ماچادو ته ورکړه او هغه یې "د ازادۍ زړوره مدافعه" او "د وینزویلا د خلکو لپاره د ډیموکراتیکو حقونو د ودې په برخه کې د نه ستړي کېدونکو هڅو" له امله وستایله.

ماچادو پر "X" ټولنیزه شبکه په یوه پیغام کې ویلي: "موږ د بریا په درشل کې یو او نن تر بل هر وخت ډېر پر ولسمشر ټرمپ، د امریکا پر خلکو، د لاتینې امریکا پر ولسونو او د نړۍ پر ډیموکراتیکو هېوادونو د خپلو اصلي متحدینو په توګه حساب کوو، ترڅو ازادي او ډیموکراسي ترلاسه کړو."

'زموږ هېواد ته لوی سپکاوی'

ټرمپ د دې جایزې لپاره په شدت سره کمپاین کړی، او همدا اوونۍ یې په غزه کې د اسرائیلو د نسل وژنې د پای ته رسولو لپاره د اوربند او د برمته ګانو د خلاصون هوکړه اعلان کړه.

د جمهوري غوښتونکي ګوند ولسمشر تر اوسه د نوبل د پرېکړې په اړه څه نه دي ویلي، خو د جمعې په سهار یې پر خپل "ټروت سوشل" اکاونټ درې ویډیوګانې خپرې کړې چې په کې ملاتړي یې د غزې د سولې هوکړه لمانځي، کومه چې د اسرائیلو د نسل وژنې د پای ته رسېدو لامل کیږي.

ټرمپ د هغې جایزې د ګټلو لپاره چې د هغه څلورو مخکینیو ولسمشرانو - بارک اوباما په ۲۰۰۹، جیمي کارټر په ۲۰۰۲، ووډرو ویلسن په ۱۹۱۹ او تیوډور روزویلټ په ۱۹۰۶ کې ګټلې وه - په ښکاره توګه هیلې څرګندې کړې دي.

له کارټر پرته ټولو دا جایزه د خپلې دندې پر مهال ګټلې ده، چې اوباما له واک ته رسېدو څخه لږ تر لږه اته میاشتې وروسته د جایزې ګټونکی اعلان شو - په هماغه حالت کې چې ټرمپ اوس دی.

نوبل هغه جایزه ده چې ټرمپ یې له ډېرو کلونو راهیسې هیله لري.

په ملګرو ملتونو کې په یوه وروستۍ وینا کې، ټرمپ په وار وار ویلي وو چې "اووه نه ختمېدونکې جګړې یې پای ته رسولي دي."

تېره اوونۍ، هغه یو ګام نور هم وړاندې لاړ او ویې ویل، که د غزې لپاره د هغه ۲۰ ماده ییزه د سولې طرحه بریالۍ شي، "موږ به اته [جګړې] ولرو، په اتو میاشتو کې اته. دا ډېره ښه خبره ده،" او زیاته یې کړه "هېچا دا کار نه دی کړی. ایا تاسو به د نوبل جایزه ترلاسه کړئ؟ بالکل نه."

ټرمپ د سپټمبر په ۳۰مه په ویرجینیا کې پوځي مشرانو ته په خپله وینا کې د نوبل پر کمیټې هم نیوکه وکړه او ویې ویل: "دوی به دا جایزه داسې چا ته ورکړي چې هېڅ کوم کار یې نه وي کړی. خو زه درته وایم، دا به زموږ هېواد ته یو لوی سپکاوی وي."