د طلوع نیوز  د راپور له مخې، د افغانستان د  بهرنیو چارو وزارت په خپره کړې خبرپاڼه کې ویلي چې د نړۍ په هره برخه کې د افغان اتباعو د حقونو ساتنه د نظام مسؤلیت دی.

په خبرپاڼه کې ټینګار شوی چې په هره نقطه کې افغانانو ته باید د نړیوالو منل شویو بشري اصولو له مخې درناوی او درملنه وشي. پر دې سربېره له درېیمو هېوادونو غوښتل شوي چې د بهرنیو اتباعو برخلیک او راتلونکی د خپلو لنډمهالو ګټو پر وړاندې د معاملې برخه ونه ګرځوي.

په اعلامیه کې زیاته شوې چې کابل د امریکايي ادارو د دغې احتمالي پرېکړې او راپورونو له امله راپورته شوی حالت په دقیق ډول تعقیبوي.

تر دې وړاندې راپورونه خپاره شوي وو چې د امریکا حکومت پلان لري په لوزیانا (Louisiana) ایالت کې د قانوني استوګنیزو اسنادو د نشتوالي له امله نیول شوي تر ۱۵۰ ډېر افغان کډوال لومړی پاکستان ته ولېږدوي، ترڅو د هغوی د اېستلو پروسه د افغانستان تر پولې پورې د پاکستان له لوري وڅارل شي.

دا په داسې حال کې ده چې د امریکا متحده ایالاتو قوانین د حکومت له خوا هغو هېوادونو ته د افرادو لېږل او اېستل منع کوي چې محکمو په کې د هغوی پر وړاندې د سخت «اذیت او ځورونې» زیات احتمال تایید کړی وي.