مسکو د ملکي مسافرو پر بس د دغه وژونکي برید پړه پر اوکراین اچوي؛ دا په داسې حال کې ده چې دواړو خواوو د ډرون جګړه ګړندۍ کړې او د نور تاوتریخوالي خبرداری یې ورکړی دی.
د مسکو تر ملاتړ لاندې چارواکو په وینا، د چهارشنبې په ورځ د روسیې تر اشغال لاندې ختیځ اوکراین دونیتڅک سیمه کې پر یوه مسافر وړونکي بس د ډرون برید له امله اووه کسان وژل شوي او ۱۱ نور ټپیان شوي دي.
د سیمې لپاره د کرملین لخوا ټاکل شوي مشر، ډینیس پوشیلین وویل چې دغه ډرون د مسکو او سمفروپول ترمنځ پر یوه بس برید کړی چې د روسیې تر اشغال لاندې کریمیا ته روان و.
روسي چارواکو دا پېښه پر ملکي وګړو یو قصدي برید بللی دی. د دولتي رسنیو په وینا، د دغه هېواد تحقیقاتي کمېټې ویلي چې د ترهګرۍ په تور یې یوه جنايي دوسیه پرانیستې ده.
دا برید د روسیې او اوکراین ترمنځ د ډرون بریدونو د زیاتېدو په ترڅ کې شوی، چې دواړو خواوو په وروستیو ورځو کې د پراخو عملیاتو راپورونه ورکړي دي.
د ډرون جګړې پراخېدل
روسیې ویلي چې هوايي دفاعي سیسټمونو یې د شپې لخوا ۳۵۴ ډرون الوتکې شنډې کړې دي، چې دا په دې جګړه کې د هوايي بریدونو مخ په زیاتېدونکې کچه په ګوته کوي.
دا وروستی برید د سې شنبې په ورځ پر کییف د روسیې له پراخو توغندیزو او ډرون بریدونو وروسته شوی دی. مسکو ویلي چې دا په لوهانسک کې د روسیې تر اشغال لاندې سیمه کې پر یوې لیلیې باندې د اوکراین د مخکني برید غچ و.
د اوکراین ولسمشر ولادیمیر زیلینسکي خبرداری ورکړی چې ښايي د روسیې نور بریدونه هم نږدې وي، چې دې چارې په داسې جګړه کې د تاوتریخوالي د زیاتېدو وېره رامنځته کړې چې اوس پکې تر ډېره لیرې واټن ویشتونکي ډرون بریدونه کارول کیږي.
