د ځايي چارواکو او د AFP خبري اژانس د خبریال په وینا، اوکرایني ډرون الوتکو د جمعې په سهار وختي د روسیې د سینټ پیټرزبرګ ښار ته څېرمه پر یو ګودام برید وکړ، چې له امله یې اور ولګېد او په تاریخي ښار کې لوګي خپاره شول.

کیف په وروستیو اونیو کې د روسیې د انرژۍ، نظامي او لوجیستیکي مرکزونو په نښه کولو لپاره خپل د لیرې واټن ډرون بریدونه زیات کړي او دا ځل یې سینټ پیټرزبرګ په نښه کړی دی.

ځايي رسنیو خبر ورکړی چې دغه بریدونه د روسیې د انلاین پرچون پلورنې ستر شرکت "ویلډبیري" (Wildberries) اړوند ګودامونه په نښه کړي دي. دغه شرکت ویلي چې په ښار کې یې د خپلو دوو ګودامونو فعالیت په لنډمهاله توګه درولی، خو په دې اړه یې نور جزییات نه دي ورکړي.

د اژانس فرانس پرس  یو خبریال لیدلي چې د سهار په اسمان کې د جګپوړو ودانیو له پاسه تور لوګي پورته کېدل.

د سینټ پیټرزبرګ والي الکساندر بیګلوف په ټولنیزو رسنیو کې ولیکل: "سینټ پیټرزبرګ د نظامي موخو لرونکو بې پیلوټه الوتکو (ډرون) له برید سره مخ شو... برید پر ملکي زیربناوو شوی دی." نوموړي د نورو جزییاتو له ورکولو پرته زیاته کړه چې د برید د پایلو د کنټرول لپاره هڅې روانې دي.

په تېره یوه اونۍ کې اوکرایني بریدونو د "ویلډبیري" شرکت څو نور مرکزونه هم په نښه کړي، چې ځینې یې مسکو ته نږدې دي.

د اوکراین ولسمشر ولادیمیر زیلینسکي ویلي چې دغه شرکت د هغو نظامي تجهیزاتو برخې ساتي او لیږدوي چې بندیزونه پرې لګول شوي دي.