د کالیفورنیا والي ګاوین نیوسم د چهارشنبې په ورځ په یوه ویډیو بیان کې وویل: "نن مې د کالیفورنیا ایالت په استازیتوب د ټرمپ ادارې پر وړاندې اقامه د دعوه اعلان کړه." دا دعوه په فدرالي محکمه کې ثبت شوې ده چې د نړیوالو اقتصادي بیړنیو واکونو قانون د کارونې له لارې د کانګرس له اجازې پرته تعرفو لګولو باندې تمرکز کوي.
نیوسم زیاته کړه: "کالیفورنیا زموږ د هیواد تر ټولو لوی تولیدي ایالت دی او د نړۍ له لویو سوداګریزو شریکانو څخه دی. د ټرمپ ادارې لخوا د یو اړخیز واک له لارې د تعرفو د لګولو په اړه، هیڅ ایالت به د کالیفورنیا په پرتله زیات اغېزمن نشي، ځکه چې دا د عصري امریکایي تاریخ تر ټولو لوی مالیاتي زیاتوالی دی."
هغه وویل: "دا د دې هېواد په تاریخ کې تر ټولو لویه خپله ځان ته زیان رسوونکې کړنه ده. دا د عصري امریکایي تاریخ له هغو کړنو څخه ده چې تر ټولو زیات زیان یې اړولی دی."
د ۴۰ میلیونه خلکو او د یوې لویې نړیوالې سوداګرۍ لرونکي اقتصاد سره چې د امریکا د ناخالص کورني تولید ۱۴ سلنه جوړوي، کالیفورنیا د اقتصادي زیانونو له امله چې د دې وروستیو بدلونونو له امله اټکل کېږي، تر ټولو زیات اغېزمن کېدونکی ښکاري.
د نیوسم دفتر وایي که کالیفورنیا یو خپلواک هېواد وای، د نړۍ پنځم لوی اقتصاد به وای. د ټرمپ د تعرفو د سیاستونو له امله که نړیواله سوداګري کمه شي، په میلیاردونو ډالر عاید له لاسه ورکولی شي.
د کالیفورنیا په دعوه کې ویل شوي: "د امریکا اساسي قانون د تعرفو لګولو واک کانګرس ته سپارلی دی، او هغه قانون چې ټرمپ یې د خپلو نویو تعرفو لپاره د واک په توګه یادوي، ولسمشر ته اجازه نه ورکوي چې د خپلې خوښې پر بنسټ په ټولو وارداتي توکو مالیه ولګوي."
په دعوه کې راغلي: "د ولسمشر ټرمپ د تعرفو نوی نظام لا دمخه په اقتصاد باندې ویجاړونکي اغېز کړی دی، د ونډو بازارونو کې ګډوډي رامنځته کړې، په څو ساعتونو کې په سلګونو میلیاردونه ډالر زیان رسولی دی او د ونډو بیې راټیټې کړي، د پانګونې مخه نیولې او هېواد یې د رکود پر لور ګواښلی دی."
د دعوې له مخې د نړۍ پنځم لوی اقتصاد او د امریکا ایالتونو تر منځ د توکو تر ټولو لوی واردوونکی کالیفورنیا، د تعرفو د لګښتونو "غیر متناسبه برخه" پر غاړه لر.
د سپینې ماڼۍ ویاند کوش دیسای د چهارشنبې په ورځ وویل چې د کالیفورنیا والي ګاوین نیوسم باید د خپل ایالت د جرمونو، بې کوره خلکو او لوړو بیو پر حل تمرکز وکړي، پر ځای د دې چې د ټرمپ تعرفې بندې کړي.
دیسای زیاته کړه: "ټوله ټرمپ اداره ژمنه ده چې د دې ملي بیړنۍ ستونزې د حل لپاره چې د امریکا صنعتونه له منځه وړي او زموږ کارګران يي له پامه غورځولي، له ټولو شته وسیلو څخه کار واخلي، له تعرفو نیولې تر خبرو اترو پورې."
د ټرمپ اداره لا دمخه له درې ورته دعوو سره مخ ده — یوه د نیویارک په نړیوالې سوداګرۍ محکمې کې د سوداګرۍ د ملاتړ ډلې لیبرټي جسټس سنټر لخوا چې د ټولو تعرفو د بندولو غوښتنه کوي، بله په فلوریډا کې د یوه کوچني سوداګر لخوا چې د چین پر تعرفو د بندیز غوښتنه کوي، او درېیمه په مونټانا کې د بلیکفیټ ملت د غړو لخوا چې د کاناډا پر تعرفو د ټرمپ د پریکړې پر وړاندې ده.
