پولنډي جټ الوتکو د بالتیک سمندر پر سر د روسیې  د  یوې بلې الوتکې مخه ونیوله

د پولنډ د دفاع وزیر کوسینیاک- کامیز وویل، د پنجشنبې په سهار د MiG-29 جنګي الوتکې د بالتیک سمندر پر سر د یوې بلې روسي الوتکې د مخنیوي لپاره واستول شوې.

د پولنډ جنګي الوتکو د پنجشنبې په ورځ اعلان وکړ چې د درې ورځو په موده کې دا دوهم ځل دی چې د بالتیک سمندر پر سر یې د یوې " روسیې جاسوسي الوتکې" مخنیوی کړی دی.

د پولنډ دفاع وزیر ولادیسلاف کوسینیاک- کامیز د پولنډ تلویزیوني چینل ټي وي پي ورلډ ته وویل چې د پنجشنبې په سهار د MiG-29 جنګي الوتکې د بالتیک سمندر پر سر د یوې بلې روسي الوتکې د نیولو لپاره استول شوې وې.

تر دې یوه ورځ مخکې، د چهارشنبې په ورځ، د پولنډ پوځ په یوه اعلامیه کې ویلي وو چې د روسیې Il-20 الوتکه د نړیوالو هوايي سیمو له لارې پرته له دې چې د الوتنې پلان وړاندې کړي او د ټرانسپوندر (پیژندنې آله) فعاله کړي، الوتنه کوله.

په اعلامیه کې راغلي: "د ۲۰۲۵ کال د اکتوبر په ۲۸مه، د هوايي ځواک د MiG-29 یوې جوړې ګزمې وهونکو جنګي الوتکو په بریالیتوب سره د روسیې فدراسیون یوه الوتکه ونیوله، د سترګو له لارې یې وپېژندله او له مسؤلیت ساحې یې بهر ملتیا وکړه."

پوځ زیاته کړه چې دغه روسي الوتکه د بالتیک سمندر پر سر الوتنه کوله.

اروپایي هېوادونو پر روسیه تور پورې کړی چې د وروستیو پېښو په ترڅ کې یې د بې ‌پيلوټه الوتکو له لارې د دوی له هوايي حریم څخه سرغړونه کړې، خو مسکو دا تورونه رد کړي دي.

تاوتریخوالی هغه مهال زیات شو کله چې د سپتمبر په ۹مه نېټه شاوخوا ۲۰ بې ‌پيلوټه الوتکې د اوکراین پر ضد د پراخ برید پر مهال د پولنډ هوايي حریم ته داخلې شوې، چې له امله یې د ناټو جنګي الوتکو د پولنډي ځواکونو سره ګډې ګزمې ‌يې پیل کړې.

د ناټو نور غړي هېوادونه، لکه لیتوانیا، لاتویا او استونیا هم د ورته هوايي سرغړونو راپورونه ورکړي دي.