په امریکا کې د کډوالۍ او ګمرکونو پلي کولو ادارې (ICE) په توقیف ځای کې د مرګونو شمیره مخ په لوړیدو ده.
د ۲۰۲۶ کال په لومړیو ورځو کې د امریکا د کډوالۍ او ګمرکونو پلي کولو ادارې (ICE) په توقیف ځای کې لږ تر لږه څلور کډوال مړه شوي دي. دا پېښې وروسته له هغه کیږي چې تیر کال د توقیف شویو کسانو د مړینو له پلوه ریکارډ ماتوونکی و او د بندیانو په شمېر کې هم د پام وړ زیاتوالی راغلی و.
د امریکا د کډوالۍ او ګمرکونو پلي کولو ادارې (ICE) له خوا کارول شوي د مخامخ کېدو تاکتیکونه د جنورۍ په ۷مه نېټه د مینیسوټا په مینیاپولیس ښار کې د لاریون کوونکې ریني نیکول ګوډ له مرګونې ویشتنې راهیسې د ټولو پام ددې ادارې توقیف خونو ته اوښتی دی.
خو د دې ادارې له خوا خپاره شوي معلومات ښيي چې د کډوالو د توقیف مرکزونه هم په کې د ساتل شویو کسانو لپاره مرګوني چاپېریالونه کیدای شي.
د د کډوالۍ او ګمرکونو پلي کولو ادارې (ICE) په توقیف ځای کې مطبوعاتي اعلامیې په ډاګه کوي چې د ۲۰۲۶ کال په همدې لومړیو څو ورځو کې یو شمېر کسان په توقیف کې مړه شوي دي - دا سملاسي وروسته له هغه کال دی چې د کډوالو بندیانو د مړینو شمېر د ۲۰ کلونو تر ټولو لوړې کچې ته ورسېد او د ICE د توقیفونو شمېر په بې سارې توګه زیات شو.
د ادارې معلومات ښيي، چې د ډسمبر تر پایه په ICE توقیف ځایونو کې تر ۶۸،۰۰۰ ډېر بالغان وو، په داسې حال کې چې د ۲۰۲۳ کال په ډسمبر کې دا شمېر شاوخوا ۳۶،۰۰۰ وو.
د ادارې په وینا، په ۲۰۲۶ کال کې لږ تر لږه څلور کسان د ICE له خوا د توقیف پر مهال مړه شوي دي.
ټولې مړینې د کال په لومړیو ۱۰ ورځو کې شوې، چې درې مړینې د جنورۍ له ۹مې تر ۱۰مې نېټې اعلان شوې.
دا کډوال، چې ټول نارینه وو، عمرونه یې د ۴۲ او ۶۸ کلونو ترمنځ وو. دوه یې د هندوراس، یو د کیوبا او څلورم یې د کمبوډیا وګړی و.
د دوو کسانو مړینه "د زړه اړوند روغتیايي ستونزو" له امله بلل شوې، او د دوو نورو د مړینې لاملونه په روښانه توګه نه دي په ګوته شوي.
د وروستیو قضیو څخه یوازې یوه یې "تر څېړنې لاندې" لیکل شوې وه.
په ۲۰۲۵ کال کې ریکارډ شمېر
مخکینی کال، ۲۰۲۵، لا دمخه د ICE د بندیانو لپاره په دوو لسیزو کې تر ټولو مرګونی کال و.
لږ تر لږه ۳۰ کسان د کډوالو په توقیف ځایونو کې د ساتل کېدو پر مهال مړه شول - چې دا د ۲۰۰۴ کال راهیسې تر ټولو لوړه شمېره ده، یعنې یو کال وروسته له هغه چې دا اداره جوړه شوه.
د ۲۰۲۵ کال شمېره د بایډن د ټولې ادارې (۲۰۲۱-۲۰۲۵) پر مهال د ICE په توقیف ځایونو کې د ثبت شویو مړینو له ټول شمېر څخه ډېره ده.
د امریکا د کډوالۍ وکیلانو ټولنې له خوا د ICE له راپورونو څخه د راټولو شویو معلوماتو له مخې، په دغو څلورو کلونو کې ۲۶ کسان د ICE په توقیف ځای کې مړه شوي وو.
بهرنیو څارونکو د هغو طبي درملنو پر کچې اندېښنې څرګندې کړې دي چې بندیان یې ترلاسه کوي.
د امریکا د مدني آزادیو اتحادیې (ACLU) د ۲۰۲۴ کال په یوه راپور کې دې پایلې ته رسېدلي چې د ICE په توقیف ځایونو کې تر ۹۵ سلنه مړینې د مناسبې پاملرنې په صورت کې د مخنیوي وړ وې.
راپور د عامه ریکارډونو غوښتنو له لارې د ترلاسه شویو زرګونو پاڼو اسنادو په مطالعې سره د ۲۰۱۷ او ۲۰۲۱ کلونو ترمنځ د ICE په توقیف ځایونو کې مړینې تحلیل کړې دي.
طبي کارپوهانو چې دا اسناد یې څېړلي، د ناسمې یا نامناسبې درملنې او همدارنګه د طبي پاملرنې د سخت ځنډ پراخ شواهد موندلي دي.
اې اېف پي (AFP) له ICE سره اړیکه ونیوله، خو د دې راپور تر خپرېدو پورې یې د تبصرې غوښتنې ته ځواب ونه وایه.
