د ژغورنې یوې ډلې او یوه سیمه ییز پولیس چارواکي ویلي، چې د یکشنبې په ورځ د پاکستان په شمال لویدیځ کې د پولیسو په د یو مرکز مخې ته په یو شکمن ځانمرګي برید کې لږ تر لږه ۱۴ کسان وژل شوي دي. دا برید په داسې حال کې شوی چې دا هېواد له مخ په زیاتېدونکو ناامنیو سره لاس او ګرېوان دی.
دا چاودنه د خېبر پښتونخوا ولایت د سوات ولسوالۍ په کبل سیمه کې شوې ده.
د یکشنبې په ورځ په همدې سیمه کې د ځايي اوسېدونکو له خوا د پولیسو په ملاتړ یوه غونډه (لاریون) هم روانه وه، خو سمدستي دا څرګنده نه وه چې ایا د برید اصلي هدف همدا غونډه وه که نه.
د پولیسو یوه سیمه ییز چارواکي، فدا حسین ویلي چې په وژل شویو کې پنځه پولیس افسران او اته ملکي وګړي شامل دي. هغه روېټرز ته وویل، ګومان کېږي چې څوارلسم کس پخپله ځانمرګی بریدګر وي.
د پولیسو د یوې اعلامیې له مخې، په دغه برید کې لږ تر لږه ۱۸ کسان ټپیان شوي دي. په بیان کې ویل شوي چې د هغو کسانو د نیولو لپاره عملیات پیل شوي چې ممکن په دې برید کې یې مرسته کړې وي.
تحریک طالبان پاکستان وسله والې ډلې په یوه بیان کې د دغه برید مسؤلیت منلی دی.
د پاکستان لومړي وزیر محمد شهباز شریف په یوه بیان کې د دغه ځانمرګي برید له امله "ژوره خواشیني او غم" څرګند کړی دی.
په وروستیو میاشتو کې د پاکستان په سرحدي سیمو کې وسله وال فعالیتونه په چټکۍ سره زیات شوي، چې ډېری یې پوځ او پولیس په نښه کوي.
پاکستاني حکومت د دغو بریدونو د زیاتوالي پړه پر افغان طالبانو اچوي او تور لګوي چې هغوی له وسله والو سره مرسته کوي. خو د طالبانو حکومت تل دا تورونه رد کړي دي.
