د فرانسوي قیمتي ښیښو جوړوونکي شرکت "لالیک" (Lalique) پر موزیم له غلا وروسته، څېړونکي پر دې کار کوي چې شکمنو کسانو څنګه امنیتي تدابیر مات کړي او ۲۰ قلمه اثار یې تښتولي دي.
د فرانسوي ورځپاڼې "لو پاریزین" (Le Parisien) د راپور له مخې، چې د څېړنو اړوندو سرچینو په حواله یې ورکړی، د فرانسې په شمال ختیځ کې د وینګن-سور-مودر (Wingen-sur-Moder) ښار په "لالیک" موزیم کې د یکشنبې په سهار غلا شوې ده چې په کې د نږدې ۴ میلیونه یورو  په ارزښت ګاڼې غلا شوې دي.

په راپور کې ویل شوي چې څو تنو مخ پټو غلو یوه دروازه په زور خلاصه کړې، شپږ ویترینونه یې مات کړي او ۲۰ دانې کرسټالي ګاڼې یې اخیستي او تښتېدلي دي.

د خبر په دوام کې راغلي چې د چارواکو لخوا د زیانونو د ارزونې او د امنیتي تدابیرو د ټینګښت لپاره به دا موزیم په راتلونکو څو ورځو کې تړلی وي.

موزیم پر اېکس (X) ټولنیزه شبکه په یوې بیانیه کې ویلي: "ژاندرم (پولیس) سیمې ته رسېدلي او څېړنې به په خپل عادي ډول پرمخ ولاړې شي."

د وینګن-سور-مودر ښاروال، کریسټین ډورشینر سیمه ییزې ورځپاڼې ته په خپلو خبرو کې ویلي، ګومان کیږي چې غلو "ښه معلومات" لرل ځکه چې دوی نیغ په نیغه د ګاڼو ټولګې (کالکشن) ته تللي وو.

ښاروال زیاته کړه چې د موزیم د خطر زنګ (الارم) سیستم سم کار کاوه، خو امنیتي شرکت پولیسو ته په سمدستي خبر ورکولو کې ځنډ کړی دی.

چارواکي دا مهال د امنیتي کمرو ویډیوګانې ګوري او د قضیې پلټنه د "با-رین" (Bas-Rhin) سیمې د ژاندرم جنايي څېړنو څانګې ته سپارل شوې ده.

لو پاریزین ورځپاڼې لیکلي چې د ۲۰۲۵ کال په اکتوبر کې د "لوور" (Louvre) په موزیم کې د ۱۰۲ میلیونه ډالرو په ارزښت د تاریخي اثارو له سترې غلا وروسته، دغه موزیم (لالیک) د "بې دفاع او زیانمنوونکو ځایونو" په لېست کې شامل شوی و او تر "ځانګړې څارنې" لاندې ساتل کېده.