د قطر لومړي وزیر او د بهرنیو چارو وزیر شیخ محمد بن عبدالرحمن آل ثاني د اسرائیلو لومړی وزیر بنیامین نتنیاهو "جنګي مجرم" وباله او ټینګار یې وکړ چې دوحه به د سیمه ییزو کړکېچونو د زیاتېدو سره سره د خپلو منځګړیتوب هڅو ته دوام ورکړي.
د سه شنبې په ورځ له برتانوي خبریال پیرس مورګن سره په یوه مرکه کې د دې پوښتنې په ځواب کې چې ایا هغه نتنیاهو یو جنګي مجرم ګڼي؟ شیخ محمد وویل: " (پرته له شکه). په غزه کې چې څه شوي، هغه جنګي جنایتونه دي، او هر څوک چې د دې مسؤل دی، هغه جنګي مجرم دی."
هغه زیاته کړه: "روغتونونه په نښه شوي، ښوونځي په نښه شوي دي. هر ډول توجیهات او دلیلونه چې وي، هېڅ شی دا نه شي توجیه کولای."
نوموړي همدارنګه نتنیاهو تورن کړ چې پر قطر سیاسي بریدونه کوي ترڅو د ځان او خپل حکومت له کړنو څخه د خلکو پام واړوي.
آل ثاني پر دوحه د ۲۰۲۵ کال د سپټمبر د ۹مې نېټې د اسرائیلو برید یو ځل بیا وغانده، چې په ترڅ کې یې د حماس چارواکي په نښه کړل، په داسې حال کې چې قطر د منځګړیتوب په هڅو بوخت و. په دغه برید کې د حماس پنځه غړي او یو قطري امنیتي افسر ووژل شول.
هغه وویل: "موږ د منځګړیتوب پر مهال د اسرائیلو له خوا تر برید لاندې راغلو،" او دا برید یې پر یوه منځګړي بې سارې حمله وبلله.
"نتنیاهو له حد څخه اوښتی دی، لکه څنګه چې تر دې وړاندې له نورو حدودو څخه اوښتی و."د کړکېچونو سره سره، آل ثاني وویل چې قطر به ډیپلوماسۍ ته لومړیتوب ورکولو ته دوام ورکړي، او استدلال یې وکړ چې د پردې تر شا اړیکې او ښکېلتیا د پرمختګ لپاره تر ټولو اغېزمنه لاره ده.
هغه وویل: "موږ خپله بشپړه هڅه کوو چې د امریکا حکومت او همدارنګه ایرانیانو ته د حل لارې موندلو په اړه غوره مشورې ورکړو."
د پراخې سیمه ییزې شخړې په اړه، هغه وویل چې د جګړې د مخنیوي لپاره باید دریو مسایلو ته پام وشي: د ایران اټومي پروګرام او بندیزونه، د هرمز په تنګي کې د کښتیو د تګ راتګ ازادي، او هغه سیمه ییز امنیتي ترتیبات چې ایران او د خلیج د همکارۍ شورا هېوادونه پکې ښکېل دي.
نوموړي وویل چې د سیمه ییز امنیت هر ډول چوکاټ باید له پراخې اقتصادي همکارۍ سره موازي د خبرو اترو، نه لاسوهنې او نه تیري پر بنسټ جوړ شي.
د سه شنبې په ورځ وختي، د قطر د بهرنیو چارو وزارت ویاند ماجد الانصاري وویل چې دوحه د منځګړیتوب هڅو ته دوام ورکوي او د امریکا او ایران ترمنځ پیغامونه لیږدوي.
هغه وویل چې قطر د لا زیاتې پوځي شخړې (د تاوتریخوالي د پراخېدو) په اړه اندېښمن دی او د یوې سوله ییزې حل لارې په لټه کې دی.
