اردوغان له زیلینسکي سره تر لیدنې وروسته د روسیې-اوکراین جګړې د پای ته رسولو لپاره د استانبول د خبرو اترو د بیا پیل غوښتنه وکړه

د تورکیې ولسمشر اردوغان له روسیې سره د "هر هغه وړاندیز د بحث لپاره د انقرې چمتووالی څرګند کړ چې اوربند ګړندی کړي او د یوې عادلې او تلپاتې سولې لپاره لاره هواره کړي."

د تورکیې ولسمشر رجب طیب اردوغان دا څرګندونې په پلازمینه انقره کې د اوکراین له ولسمشر ولادیمیر زیلینسکي سره د لیدنې نه وروسته په ګډه خبري غونډه کې وکړې.

ولسمشر رجب طیب اردوغان د خپل اوکرایني سیال ولادیمیر زیلینسکي سره په یوه خبري کنفرانس کې وویل، تورکیه باور لري چې د اوکراین د جګړې په اړه د استانبول پروسه باید د "یو داسې هر اړخیز چوکاټ سره پلي شي چې وکولی شي اوسنۍ پیچلې ستونزې حل کړي."

اردوغان د چهارشنبې په ورځ د روانې جګړې د پای ته رسولو لپاره د تورکیې په منځګړیتوب د تنظیم شویو خبرو اترو پر اهمیت ټینګار وکړ او ویې ویل: "د استانبول خبرې اترې په داسې وخت کې په ډیپلوماټیکو هڅو کې یو مهم پړاو جوړوي چې د (روسیې-اوکراین) جګړې ویجاړونکې اغیزې مخ په ژوریدو دي."

اردوغان له روسیې سره د "هر هغه وړاندیز په اړه د بحث لپاره د انقرې چمتووالی څرګند کړ چې اوربند ګړندی کړي او د یوې عادلې او تلپاتې سولې لپاره لاره هواره کړي."

هغه ټینګار وکړ چې تورکیه له ټولو هغو شریکانو تمه لري چې غواړي د روسیې او اوکراین ترمنځ وینه تویدنه ودروي، د استانبول د پروسې په اړه رغنده دریځ خپل کړي.

 د اوکراین ولسمشر زیلینسکي له خپل لوري وویل چې اوکراین هیله لري د کال تر پایه له روسیې سره د جنګي بندیانو تبادله بیا پیل کړي.

هغه دا هم زیاته کړه چې اوکراین له روسیې سره د جګړې پای ته رسولو کې د مرستې لپاره د تورکیې په ډیپلوماټیکو هڅو تکیه کوي.

زیلینسکي وویل: "البته، موږ د ډیپلوماسۍ د وضعیت په اړه مفصلې خبرې وکړې. او اوس ډیری پروسې لا فعالې شوې دي، او موږ هڅه کوو ډاډ ترلاسه کړو چې ټول فعالیتونه په ځانګړي ډول سولې ته متوجه وي."